വയനാട് പാക്കേജ് നടപ്പാക്കുന്നതിന് ഉന്നതതല സമിതി

കോഴിക്കോട്: വയനാട് പാക്കേജ് സമയബന്ധിതമായി നടപ്പിലാക്കുന്നതിനും വിലയിരുത്തുന്നതിനും സംസ്ഥാനതലത്തിൽ ചീഫ് സെക്രട്ടറിയുടെ അധ്യക്ഷതയിൽ സംസ്ഥാനതല ഉന്നത സമിതി (എസ്.എൽ.ഇ.സി) രൂപവത്കരിക്കും. അതുപോലെ ജില്ലാ തലത്തിലും കോ-ഓർഡിനേഷൻ കമ്മിറ്റി (ഡി.എൽ.സി.സി) രൂപവത്കരിക്കുന്നതിനുള്ള നടപടികൾ തുടങ്ങി.

വയനാട് ജില്ലയുടെ സമഗ്ര വികസനത്തിനായി 2022-23 ബജറ്റിൽ 75 കോടി രൂപയും 2023-24 ബജറ്റിൽ 75 കോടി രൂപയും വകയിരുത്തി. പാക്കേജിന്റെ ഡി.പി.ആർ സംസ്ഥാന ആസൂത്രണ ബോർഡ് പരിശോധിക്കുകയാണ്. പാക്കേജിന്റെ മാർഗ രേഖ രൂപവത്കരിക്കുന്നതിനും ഇതിൽ ഉൾപ്പെട്ട പ്രോജക്ടുകളുടെ നിർവഹണത്തിലും ഉന്നതതല സമിതി നിർദേശം നൽകും.