വരൾച്ച കനക്കു​േമ്പാഴും ജലനിധി പദ്ധതി അവതാളത്തിൽ

കോഴിക്കോട്​: സംസ്​ഥാനത്തി​​​െൻറ ജലക്ഷാമത്തിന്​ പരിഹാരമായി ലോകബാങ്ക്​ സഹ​ായ​ത്തോടെ നടപ്പാക്കുന്ന ജലനിധി പദ്ധതി രണ്ടാംഘട്ടം അവതാളത്തിൽ. നടത്തിപ്പിലെ അവധാനതക്കൊപ്പം ആവശ്യമായ പശ്ചാത്തല സൗകര്യങ്ങൾ ഇല്ലാത്തതും​ പദ്ധതിക്ക്​ വിനയാകുന്നു. 2011ൽ 20​ ലക്ഷം കുടുംബങ്ങൾക്ക്​ ലക്ഷ്യമിട്ട്​ തുടങ്ങിയ പദ്ധതി അഞ്ചുവർഷം പിന്നിടു​േമ്പാഴും 10​ ശതമാനം പേർക്കുപോലും എത്തിക്കാൻ കഴിയാത്തതിനാൽ പാഴാവുന്ന അവസ്​ഥയാണ്​.

1027 കോടി രൂപയുടെ ലോകബാങ്ക്​ സഹായത്തിൽ 200 പഞ്ചായത്തുകളെ ഉദ്ദേശിച്ചുള്ള പദ്ധതിയിലേക്ക്​  119 പഞ്ചായത്തുകളെയാണ്​ തെരഞ്ഞെടുത്തത്​.  20, 60, 23,16 പഞ്ചായത്തുകൾ വീതം നാലു​ ഘട്ടങ്ങളിലായി നടപ്പാക്കാനാണ്​ ലക്ഷ്യമിട്ടിരുന്നത്​.  2018 വരെയാണ്​ പദ്ധതി നടപ്പാക്കാനുള്ള കാലാവധിയെങ്കിലും  രണ്ടര വർഷത്തിനകം ഒാരോഘട്ടവും പൂർത്തീകരിക്കണം എന്നാണ്​ ചട്ടം.

എന്നാൽ, ആദ്യ ഘട്ടമായ 20 പഞ്ചായത്തുകൾക്കുതന്നെ പദ്ധതി കൈമാറ്റം നടക്കാത്തതിനാൽ തുടർഘട്ടങ്ങൾ പ്രതിസന്ധിലാണ്​. ഇതോടെ നടപ്പാക്കൽ ചുമതലയുള്ള സഹായ സംഘടനകളും പദ്ധതി കൈയൊഴിയുന്ന മട്ടാണ്​. 120 സഹായ സംഘടനകളിൽ എ​െട്ടണ്ണം ഇതിനകം വിട്ടുപോയി. ശേഷിക്കുന്ന സംഘടനകളുടെ പ്രവർത്തന കാലാവധി ഇതിനകം രണ്ടു തവണ നീട്ടി. 2017 ഡിസംബർ 31 ആണ്​ അവസാന കാലാവധി. പദ്ധതി നടപ്പാവണമെങ്കിൽ  കാലാവധി ഇനിയും നീ​േട്ടണ്ടിവരും. ഇക്കാര്യം ചൂണ്ടിക്കാട്ടി സഹായ സംഘടനകൾ സർവിസ്​ ചാർജ്​ വർധനക്ക്​ ആവശ്യപ്പെട്ടിട്ടുണ്ടെങ്കിലും പുതിയ ഭരണസമിതി തെരഞ്ഞെടുപ്പ്​ നടക്കാത്തതിനാൽ ഇക്കാര്യവ​​ും സ്​തംഭനത്തിലാണ്​.

ജലവിഭവ വകുപ്പിനു​ കീഴിൽ കേരള റൂറൽ വാട്ടർ സപ്ലൈ ആൻഡ്​ സാനിറ്റേഷൻ ഏജൻസിക്കു​ കീഴിൽ കണ്ണൂർ, പെരിന്തൽമണ്ണ, ഇടുക്കി എന്നിവിടങ്ങളിൽ മേഖല ഒാഫിസുകളിൽ പ്രവർത്തിക്കുന്ന പദ്ധതിക്ക്​ ഇരുപതോളം ജീവനക്കാർ മാത്രമാണ്​ ഉള്ളത്​. അതേസമയം, പദ്ധതിക്ക്​ 2018 വരെ കാലാവധിയുണ്ടെന്നും ആവശ്യമായി വന്നാൽ നീട്ടിവാങ്ങുമെന്നുമാണ്​ ജലനിധി അധികൃതർ പ്രതികരിച്ചത്​. 2005ൽ തുടങ്ങിയ ആദ്യഘട്ടം വിജയകരമായതിനെ തുടർന്നാണ്​ പുതിയ ഘട്ടത്തിന്​ തുടക്കംകുറിച്ചിരുന്നത്​.