വാളയാർ കേസ്​: മൂന്ന്​ പ്രതികളെ കോടതിയിൽ ഹാജരാക്കി

പാലക്കാട്​: ​വാളയാർ കേസിൽ പോക്​സോ കോടതി കുറ്റവിമുക്​തരാക്കിയ മൂന്ന്​ പ്രതികളെ കോടതിയിൽ ഹാജരാക്കി. ഒന്നും മൂന്നും നാലും പ്രതികളായ അട്ടപ്പള്ളം കല്ലങ്കാട്​ സ്വദേശി എം. മധു, ചേർത്തല സ്വദേശി പ്രദീപ്​കുമാർ, വി. മധു എന്നിവരെയാണ്​ ഹൈകോടതി ഉത്തരവ്​ പ്രകാരം പാലക്കാട്​ പോക്​സോ കോടതിയിൽ ഹാജരാക്കിയത്​. എം. മധു, വി. മധു എന്നിവരെ വാളയാർ പൊലീസ്​ അറസ്​റ്റ്​ ചെയ്​തുകൊണ്ടുവരുകയായിരുന്നു.

അഭിഭാഷകൻ മുഖേനയാണ്​ പ്രദീപ്​കുമാർ ഹാജരായത്​. പ്രദീപ്​കുമാറി​​െൻറ അറസ്​റ്റ്​ രേഖപ്പെടുത്തിയശേഷം മൂന്നു പേർക്കും ജഡ്​ജ്​ എസ്​. മുരളീകൃഷ്​ണ ജാമ്യം അനുവദിച്ചു. രണ്ടാം പ്രതി ഇടുക്കി രാജാക്കാട്​ വലിയമുല്ലക്കാനം നാലുതെയ്​ക്കൽ ഷിബുവിനെ കണ്ടെത്താനായിട്ടില്ല. തമിഴ്​നാട്ടിലുണ്ടെന്ന്​ കരുതുന്ന ഇയാൾക്ക്​ വേണ്ടി വാറൻറ്​​ പുറപ്പെടുവിപ്പിക്കും.

ഒന്നു മുതൽ നാലുവരെ പ്രതിക​െള വെറുതെവിട്ട നടപടിക്കെതിരെ സംസ്ഥാന സർക്കാറി​​െൻറ അപ്പീലും അമ്മയുടെ ഹരജിയും വേനലവധി കഴിഞ്ഞ്​ മേയ്​ 25ന്​ ഹൈകോടതി പരിഗണിക്കും. ആറ്​ കേസുകളിലായി നാല്​ പ്രതികളുടെ വിചാരണയാണ്​ നേരത്തെ പാലക്കാട്​ പോക്​സോ കോടതിയിൽ നടന്നത്​. രണ്ട്​ വർഷം നീണ്ട വിചാരണക്കൊടുവിൽ തെളിവുകളുടെ അഭാവത്തിൽ 2019 ഒക്​ടോബറിൽ എം. മധു, ഷിബു, പ്രദീപ്​കുമാർ, വി. മധു എന്നിവരെ കോടതി കുറ്റവിമുക്​തമാക്കുകയായിരുന്നു.

പ്രായപൂർത്തിയാകാത്ത അഞ്ചാം പ്രതിയുടെ കേസ്​ പാലക്കാട്​ ജുവനൈൽ കോടതിയിലാണ്​. ഇയാൾ കോടതി ഉപാധികളോടെ ജാമ്യത്തിലായതിനാൽ അറസ്​റ്റ്​ ആവശ്യമില്ലെന്ന്​ ഹൈകോടതി വ്യക്​തമാക്കിയിട്ടുണ്ട്​. വാളയാറിൽ 13കാരിയെ 2017 ജനുവരി 13നും സഹോദരിയായ ഒമ്പതുവയസ്സുകാരിയെ 2017 മാർച്ച്​ നാലിനുമാണ്​ വീട്ടിനകത്ത്​ തൂങ്ങി മരിച്ച നിലയിൽ ക​​ണ്ടെത്തിയത്​.

കുട്ടികൾ പ്രകൃതിവിരുദ്ധ പീഡനത്തിനിരയായതായി പോസ്​റ്റ്​മോർട്ടം റിപ്പോർട്ടിൽ തെളിഞ്ഞിരുന്നു. വെറുതെ വിട്ടതിനെതിരെ സംസ്ഥാന സര്‍ക്കാര്‍ നല്‍കിയ അപേക്ഷയിലാണ് ഹൈകോടതി ​പ്രതികളെ അറസ്​റ്റ്​ ചെയ്​ത്​ വിചാരണ കോടതിയിൽ ഹാജരാക്കാൻ നിർദേശിച്ചത്​.