പൊലീസ് വെടിവെച്ചത് സ്വയംരക്ഷക്ക് -ഐ.ജി

കൽപറ്റ: സ്വയം രക്ഷക്കുവേണ്ടിയാണ് മാവോവാദികൾക്കുനേരെ പൊലീസ് സംഘം വെടിയുതിർത്തതെന്ന് കണ്ണൂർ ഐ.ജി ബൽറാം കുമാർ ഉപാധ്യായ. സുഗന്ധഗിരി പ്രദേശത്ത് വർഷങ്ങളായി മാവോവാദി സാന്നിധ്യമുണ്ട്. പട്ടികജാതി-പട്ടികവർഗക്കാരാണ് മേഖലയിൽ ക ൂടുതലുള്ളത്. കൂടാതെ, പൊതുജനങ്ങൾക്കും ഇവിടെയെത്തുന്ന വിനോദ സഞ്ചാരികൾക്കും സുരക്ഷ ഉറപ്പാക്കേണ്ട ഉത്തരവാദിത്ത ം പൊലീസിനുണ്ട്.

മാവോവാദികൾ കോളനികളിലെത്തി പണവും ഭക്ഷണസാധനങ്ങളും ആവശ്യപ്പെടുന്നത് പതിവാണ്. റിസോർട്ടിലെ ജീവനക്കാരാണ് രണ്ടു മാവോവാദികളെത്തിയ വിവരം പൊലീസിനെ അറിയിച്ചത്. പൊലീസ്​ എത്തിയതോടെ മാവോവാദികൾ വെടിയുതിർക്കുകയായിരുന്നു. കീഴടങ്ങാൻ അവസരം നൽകിയെങ്കിലും അവർ തയാറായില്ല. ഒടുവിൽ സ്വയം രക്ഷക്കുവേണ്ടിയാണ് പൊലീസ് വെടിവെച്ചത്-അദ്ദേഹം പറഞ്ഞു.
സി.പി. ജലീലാണ് കൊല്ലപ്പെട്ടത്. കൂടെയുണ്ടായിരുന്നയാൾ മങ്കി തൊപ്പി ധരിച്ചതിനാൽ തിരിച്ചറിയാനായിട്ടില്ല. വെടിവെപ്പിൽ ഇദ്ദേഹത്തിന് പരിക്കേറ്റിട്ടുണ്ട്. കാരണം, ഇദ്ദേഹം രക്ഷപ്പെട്ട വഴികളിൽ ചോരവീണ പാടുകളുണ്ട്. സംഘത്തിൽ കൂടുതൽ പേരുണ്ടാകാമെന്നാണ് സംശയം. മാവോവാദികൾക്കെതിരെ ശക്തമായ നടപടി തുടരുമെന്നും അദ്ദേഹം വ്യക്തമാക്കി.

ഇത്​ ‘ഓപറേഷൻ അനാക്കോണ്ട‘
കൽപറ്റ: മലബാറിൽ വർധിച്ചുവരുന്ന മാവോവാദി ​ സാന്നിധ്യം പ്രതിരോധിക്കാൻ പൊലീസ്​ നടത്തുന്ന ‘ഓപറേഷൻ അനാക്കോണ്ട’യുടെ ഭാഗമായാണ്​ ലക്കിടിയിലെ റിസോർട്ടിൽ നടത്തിയ നീക്കം. വെടിവെപ്പിൽ സി.പി. ജലീൽ കൊല്ലപ്പെ​െട്ടങ്കിലും മാവോവാദി സാന്നിധ്യമുള്ള പ്രദേശങ്ങളിൽ ഒാപറേഷൻ അനാക്കോണ്ടയുടെ ഭാഗമായുള്ള നടപടികൾ സജീവമായി തുടരുമെന്ന് കണ്ണൂർ റേഞ്ച് ഐ.ജി. ബൽറാം കുമാർ ഉപാധ്യായ പറഞ്ഞു. ഡിസംബറിലാണ് ഓപറേഷൻ അനാക്കോണ്ട ആരംഭിച്ചത്. ഒരു വർഷമായി വിവിധ റിപ്പോർട്ടുകളുടെ അടിസ്ഥാനത്തിൽ മാവോവാദി​ വിരുദ്ധ നടപടി തുടങ്ങിയിരുന്നു. മാവോവാദി വിരുദ്ധ നീക്കങ്ങളിൽ കേരള പൊലീസും തണ്ടർബോൾട്ടും ആൻറി നക്സൽ സ്ക്വാഡും ഒരുമിച്ചാണ് നടപടി സ്വീകരിക്കുന്നതെന്നും അദ്ദേഹം പറഞ്ഞു.

ജലീലിന്​ വെടിയേറ്റത്​ തലക്കു പിന്നിലും കൈയിലും
കൽപറ്റ: സാധാരണ മാവോവാദികൾ ധരിക്കുന്ന പച്ച നിറത്തിലുള്ള യൂനിഫോമിന്​ പകരം സിവിൽ വേഷത്തിലാണ്​ സി.പി. ജലീലും കൂട്ടാളിയും റിസോർട്ടിലെത്തിയത്. നീല ചെക്ക് ഷർട്ടും ചാര നിറത്തിലുള്ള പാൻറ്സുമാണ് ജലീൽ ധരിച്ചത്. കൈയിൽ ചെയിൻ വാച്ച് ധരിച്ചിരുന്നു. തലക്കു പിന്നിലേറ്റ വെടിയാണ് മരണ കാരണം. കൂടാതെ, കൈയിലും വെടിയേറ്റു. കോഴിക്കോട്- വയനാട് ദേശീയപാതയിൽനിന്ന് 50 മീറ്റർ മാത്രം അകലത്തിലാണ് മൃതദേഹം കിടന്നത്. റിസോർട്ടിലെ സ്വിമ്മിങ് പൂളിനു സമീപത്തെ പാറക്കല്ലുകളിൽ കമിഴ്ന്നു കിടക്കുന്ന നിലയിലായിരുന്നു. ഓടി രക്ഷപ്പെടുന്നതിനിടെ വെടിയേറ്റതാകാം. മൃതദേഹത്തിനരികിൽ നാടൻ തോക്കും ബാഗുമുണ്ടായിരുന്നു. അരയിൽ തോർത്ത്​ കെട്ടിയിരുന്നു.