വൈത്തിരിയിലെ ഇരുനില കെട്ടിടം മുഴുവനായി മണ്ണിലേക്കാഴ്ന്നു

വൈത്തിരി: ബസ്​സ്​റ്റാൻഡിനടുത്ത്​ പഞ്ചായത്ത് ഉടമസ്ഥതയിലുള്ള ഇരുനില കെട്ടിടം പൂർണമായും ഇടിഞ്ഞുതാഴ്ന്നു. കെട്ടിടത്തി​​​െൻറ ഒരു നില വെള്ളിയാഴ്ച മണ്ണിനടിയിലേക്കു താഴ്ന്നിരുന്നു. ഞായറാഴ്​ച വൈകീട്ട് കെട്ടിടം മുഴുവനായും മണ്ണിനടിയിലേക്ക്​ താഴുകയായിരുന്നു. ഇതേതുടർന്ന്​, സ്ഥലത്ത്​ കനത്ത സുരക്ഷ ഏർപ്പെടുത്തി. ദ്രുതകർമ സേനയും അഗ്​നിശമന സേനയും വൈത്തിരി പൊലീസിനൊപ്പം സ്ഥലത്ത്​ ക്യാമ്പ് ചെയ്യുന്നുണ്ട്. 

കെട്ടിടത്തിനടുത്തുള്ള നാലു വീടുകളിൽ ഒന്ന് താഴേക്ക് ചരിഞ്ഞു. വീടി​​​െൻറ ഷീറ്റുകൾ താഴേക്ക് പതിച്ചു. സമീപത്തെ വീടുകളും മദ്​റസ കെട്ടിടവും അപകട ഭീഷണിയിലാണ്. തൊട്ടടുത്ത ജുമാ മസ്ജിദിൽ വിള്ളലുകൾ വീണിട്ടുണ്ട്. പള്ളിയും മദ്​റസയും അടച്ചു. ജുമാ മസ്ജിദിൽ നമസ്‌കാരമിപ്പോൾ സഹകരണ ബാങ്കിനടുത്തുള്ള സ്വകാര്യ കെട്ടിടത്തിലാണ്.