വൈത്തിരിയിൽ വാഹനാപകടം: നാലര വയസുകാരന് ദാരുണാന്ത്യം

വൈത്തിരി: പിതൃസഹോദരനോടൊപ്പം സ്കൂളിൽനിന്ന് വീട്ടിലേക്ക് പോകുന്ന വഴി സ്‌കൂട്ടറിൽ ലോറിയിടിച്ച് നാലര വയസ്സുകാ രന് ദാരുണാന്ത്യം. വൈത്തിരി പള്ളത്ത് മുഹമ്മദ് റാഫിയുടെ മകൻ റാഷി മുഹമ്മദ് ഹംസയാണ് മരിച്ചത്. ചേലോട് എച്ച്​.ഐ.എം യു. പി സ്‌കൂളിലെ എൽ.കെ.ജി വിദ്യാർഥിയായിരുന്നു.

പിതാവ് മുഹമ്മദ് റാഫി ഗൾഫിലാണ്. ബുധനാഴ്ച വൈകീട്ട് നാലിന് വൈത്തിരി ഗ്രാമപഞ്ചായത്ത് ഓഫിസിനു മുന്നിലാണ് അപകടം. പിതൃസഹോദരൻ ജമാൽ, മകൻ മിലു സാജു എന്നിവരോടൊപ്പം സ്‌കൂട്ടറിൽ സഞ്ചരിക്കവെ പിന്നിൽനിന്ന്​ തമിഴ്നാട് രജിസ്ട്രേഷനിലുള്ള പാർസൽ ലോറി ഇടിക്കുകയായിരുന്നു. അപകടത്തിൽ ജമാലിന് നിസ്സാര പരിക്കേറ്റു.

ലോറി ഡ്രൈവർ കൃഷ്ണഗിരി ഗംഗാപുരം സ്വദേശി രമേശിനെ വൈത്തിരി പൊലീസ് കസ്​റ്റഡിയിലെടുത്തു. വൈത്തിരി മദ്റസയിൽ പൊതുദർശനത്തിനു ശേഷം വ്യാഴാഴ്ച ഉച്ചക്ക് ഒന്നിന് വൈത്തിരി ജുമാമസ്​ജിദിൽ ഖബറടക്കും. മാതാവ്: റസീന. സഹോദരങ്ങൾ: റഹ്‌സാൻ, ഹയാൻ.