ഹനാനെതിരെ അപവാദ പ്രചരണം: കേസെടുക്കണമെന്ന് വി എസ്

തിരുവനന്തപുരം: ഹനാന്‍ എന്ന പെണ്‍കുട്ടിക്ക് എതിരെ നവമാധ്യമങ്ങളിലൂടെ അപവാദപ്രചരണം അഴിച്ചുവിട്ടവര്‍ക്കെതിരെ സൈബര്‍ നിയപ്രകാരം കേസെടുക്കണമെന്ന് ഭരണപരിഷ്കാര കമീഷൻ ചെയർമാൻ വി.എസ് അച്യുതാനന്ദന്‍.

പ്രതികൂല സാഹചര്യങ്ങള്‍ തരണം ചെയ്ത് നിലനില്‍പ്പിനും പഠനത്തിനുമുള്ള വക തേടിയ ഹനാനെ അഭിനന്ദിക്കുന്നു. വസ്തുതകള്‍ മനസ്സിലാക്കാതെ പാവപ്പെട്ടവരുടെ അതിജീവനത്തിനായുള്ള പോരാട്ടങ്ങളെ അപമാനിക്കാന്‍ ബോധപൂര്‍വ്വം ശ്രമിച്ചവര്‍ വലിയ കുറ്റമാണ് ചെയ്തത്.

സംഘടിതമായ നവമാധ്യമ ആക്രമണങ്ങളുടെ പിന്നാമ്പുറം അന്വേഷിച്ച് കുറ്റവാളികളെ നിയമത്തിനു മുന്നില്‍ കൊണ്ടുവരാനുള്ള ബാധ്യത പൊലീസ് നിറവേറ്റണമെന്നും വി.എസ് പ്രസ്താവനയില്‍ ആവശ്യപ്പെട്ടു.