വി.ആർ. രാജമോഹന്​ കലാനിധി മാധ്യമ ശ്രേഷ്​ഠ അവാർഡ്​

തിരുവനന്തപുരം: കലാനിധി സെൻറർ ഫോർ ഇന്ത്യൻ ആർട്​സ് ആൻഡ്​​​ കൾചറൽ ഹെറിറ്റേജി​െൻറ മാധ്യമ ശ്രേഷ്​ഠ അവാർഡ്​ 'മാധ്യമം' ആലപ്പുഴ ​ബ്യൂറോ ചീഫ്​ വി.ആർ. രാജമോഹന്​. വാസ്തുശിൽപി ലാറി ബേക്കർ രൂപകൽപന ചെയ്ത ആലപ്പുഴ ജില്ല പഞ്ചായത്ത്​ ആസ്ഥാന മന്ദിരത്തി​െൻറ മുഖച്ഛായ മാറ്റാനുള്ള നീക്കം പുറത്തുകൊണ്ടുവന്ന വാർത്തയെ മുൻനിർത്തിയാണ്​ പുരസ്​കാരം. റിപ്പോർട്ടിനെ തുടർന്ന് നിർമാണചുമതല നിർവഹിച്ച കോസ്​റ്റ്​ ഫോർഡ് അധികൃതർ ഇടപെട്ട്​ അശാസ്ത്രീയ നവീകരണം നിർത്തിയിരുന്നു.

സുവർണ മുദ്ര പുരസ്‌കാരം മന്ത്രി പി. തിലോത്തമൻ,​ സംഗീതരത്‌ന പുരസ്‌കാരം പണ്ഡിറ്റ് രമേഷ് നാരായണൻ,​ കർമശ്രേഷ്ഠ പുരസ്‌കാരം ഗോകുലം ഗോപാലൻ എന്നിവർക്ക്​ നൽകുമെന്നും കലാനിധി ചെയർപേഴ്സൻ ഗീതാ രാജേന്ദ്രൻ, പ്രഫ. അയിലം ഉണ്ണികൃഷ്ണൻ എന്നിവർ വാർത്തസമ്മേളനത്തിൽ അറിയിച്ചു.

സിനിമ എവർഗ്രീൻ പുരസ്കാരം പി.വി. ഗംഗാധരൻ,​ മാധ്യമരംഗത്തെ സമഗ്ര സംഭാവന പുരസ്കാരം മനോരമ ന്യൂസിലെ ജോണി ലൂക്കോസ്, കലാപ്രതിഭ ആദർശ് പി. ഹരീഷ്,​ കലാതിലകം നിരഞ്ജന എസ്. നായർ,​ കർമശ്രേഷ്ഠ പുരസ്കാരം കെ.എസ്.ബി.സി മാനേജിങ്​ ഡയറക്ടർ പി. സ്പർജൻ കുമാർ, ഡോ. ആർ. ദിലീപ് കുമാ‌ർ (മികച്ച സാമൂഹിക സംരംഭകൻ) എന്നിവർക്ക് സമ്മാനിക്കും. പ്രഭാവർമ, പ്രഫ. അയിലം ഉണ്ണികൃഷ്ണൻ, ഡോ. എം.ആർ. തമ്പാൻ, ചേർത്തല ഡോ. ഗോവിന്ദൻകുട്ടി എന്നിവരടങ്ങിയ ജൂറിയാണ് അവാർഡ്​ നിർണയിച്ചത്​.

പെരുമ്പാവൂർ വള്ളാട്ടുതറവീട്ടിൽ റിട്ട. സെയിൽസ് ടാക്സ് ഇൻസ്പെക്ടർ പരേതനായ കെ. രാജ​​െൻറയും റിട്ട. അധ്യാപിക പരേതയായ എ. കമലത്തി​െൻറയും മകനാണ് രാജമോഹൻ. ഭാര്യ: വി. സിനി (അസിസ്​റ്റൻറ്​ എക്സി. എൻജിനീയർ, കെ.എസ്.ഇ.ബി). മകൻ: ഗൗതമൻ രാജൻ (ആർകിടെക്ട്​​). പുരസ്കാരങ്ങൾ ജനുവരി 14ന് ആറ്റുകാൽ ചൈതന്യ ഓഡിറ്റോറിയത്തിൽ നടക്കുന്ന ചടങ്ങിൽ സമ്മാനിക്കും.