ആകാശത്ത്​ ഇടി മിന്നൽ, കൂറ്റൻ സ്​ഫോടന ശബ്​ദം, ഭയന്നു വിറച്ച്​ യുക്രെയിനിൽ നിന്ന്​ മലയാളി വിദ്യാർഥിയുടെ ശബ്​ദ സന്ദേശം

മലപ്പുറം: ''പുലർച്ചെ 5.15 ഓടെ​ ഇടിമിന്നൽ പോലെ ആകാശത്ത്​ ദൃശ്യങ്ങൾ. തൊട്ടു പിറകെ എല്ലാവരെയും നടുക്കികൊണ്ട്​ വൻ സ്​​ഫോടന ശബ്​ദം. റഷ്യ യുക്രെയിന്‍റെ തലസ്ഥാനമായ കീവിൽ ബോംബിട്ടുവെന്ന വിവരമാണ്​ പിറകെ കിട്ടിയത്​. ഇതുവരെ റഷ്യയുടെ ആക്രമണമുണ്ടാവില്ലെന്നായിരുന്നു ഇവിടത്തെ നാട്ടുകാർ ഉറച്ചു വിശ്വസിച്ചിരുന്നത്​. ചൊവ്വാഴ്ച വരെ മലയാളി വിദ്യാർഥികളായ ഞങ്ങളും ഇതു തന്നെയാണ്​ കരുതിയിരുന്നത്​​. എന്നാൽ ബുധനാഴ്ച പുലർച്ചെ കഥ മാറി.

രാവിലെ ഞങ്ങളുടെ ഹോസ്റ്റൽ നിൽക്കുന്നതിന്​ 20 കി.മീ അക​ലെയുള്ള വിമാനത്താവളത്തിൽ നിന്ന് മലയാളിയായ​ സ്റ്റുഡന്‍റ്​സ്​ കോൺട്രാക്​റ്റർ വിളിച്ചിരുന്നു. റഷ്യൻ സൈന്യം യുക്രെയിൻ തലസ്ഥാനത്ത്​ ബോംബിട്ടതാണെന്ന്​ അദ്ദേഹം ടെലിഫോണിൽ അറിയിച്ചപ്പോഴാണ്​ ആകാശത്ത്​ കണ്ട മിന്നൽ പിണരും ഭയാനകമായ ശബ്​ദവും ​ബോംബുകളുടെതാണെന്ന്​ ഞെട്ടലോടെ മനസിലായത്​. താമസ സ്ഥലം ഒഴിയണമെന്ന്​​ അദ്ദേഹം ആവശ്യപ്പെട്ടതിന്‍റെ അടിസ്ഥാനത്തിൽ രാവിലെ തന്നെ വാഹനത്തിൽ പുറത്തിറങ്ങിയിരുന്നു. വെളിച്ചം വെച്ചപ്പോഴേക്കും വാഹനങ്ങളുടെ നീണ്ട നിര. പെ​ട്രോൾ പമ്പിലും സൂപ്പർമാർക്കറ്റിലുമെല്ലാം ഉള്ളതും കൈയിലെടുത്ത്​ പലായനം ചെയ്യുന്നവരുടെ കൂട്ടപ്പൊരിച്ചിൽ. എ.ടി.എമ്മിലെ പണമെല്ലാം തീർന്നിരിക്കുന്നു. ഇന്ധനം കിട്ടിയത്​ പരിമിതമായാണ്​. എല്ലാവരും കിയവിൽ നിന്ന്​ അകലെയുള്ള പ്രദേശങ്ങളിലേക്ക്​ പോവുകയാണ്​.

അപകടമുണ്ടാവുകയാണെങ്കിൽ ഭയപ്പെടരുതെന്നും ലിഫ്​റ്റ്​ ഉപയോഗിക്കരുതെന്നും കെട്ടിടത്തിന്‍റെ ഭൂഗർഭ നിലയിലേക്ക്​ പോകണമെന്നുമുള്ള നോട്ടീസ്​ അപ്പാർട്ട്​മെന്‍റുകളുടെയും​ ഹോസ്റ്റലുകളുടെയും ചുമരിൽ പതിച്ചിട്ടുണ്ട്. പുറത്തിറങ്ങിയ വിദ്യാർഥികളോട്​ ഹോസ്റ്റലിലേക്കും താമസ സ്ഥലത്തേക്കും മടങ്ങാൻ അറിയിപ്പ്​ കിട്ടിയതോടെയാണ്​ ഞങ്ങൾ തിരിച്ചു പോന്നത്​. മെട്രോ സ്​റ്റേഷനുകളും സബ്​വേയ്​സും അടുത്ത്​ തന്നെയുണ്ട്​. ആക്രമണമുണ്ടാവുകയാണെങ്കിൽ അ​ങ്ങോട്ട്​ മാറാൻ ബാഗും തയാറാക്കി ഇരിക്കുകയാണ്​. ഹോസ്റ്റലിൽ കഴിയുന്നവരോട്​ കെട്ടിടത്തിനടിയിലുള്ള ബങ്കറി​ലേക്ക്​ മാറാനും നിർദേശം നൽകിയിട്ടുണ്ട്​​. രണ്ടു മൂന്നു ദിവസത്തിനകം നാട്ടിലേക്ക്​ കൊണ്ടുപോകാനുള്ള വിമാനമെത്തുമെന്നാണ്​ കേൾക്കുന്നത്​. അതാണ്​ ഏക പ്രതീക്ഷ​''. യുക്രെയിൻ തലസ്ഥാന നഗരിക്ക്​ സമീപം കഴിയുന്ന ശാന്തപുരം സ്വദേശിയും ഒ.ഒ ബോഗോമൊളെറ്റ്സ്​ നാഷണൽ മെഡിക്കൽ യൂനിവേഴ്​സിറ്റിയിൽ അഞ്ചാം വർഷ എം.ബി.ബി.എസ് വിദ്യാർഥിയുമായ അലി ശഹീൻ മാധ്യമത്തിന്​ അയച്ചു തന്ന ശബ്​ദ സന്ദേശത്തിൽ റഷ്യൻ അധിനിവേശത്തിന്‍റെ ഭീതി നിറഞ്ഞു നിൽക്കുന്നു​.

ശഹീൻ അടക്കം 300 ഓളം മലയാളി വിദ്യാർഥികൾ യൂ​നിവേഴ്​സിറ്റിയിലുണ്ട്​. കിയവ്​ ബോറിസ്പിൽ വിമാനത്താവളത്തിന്​ സമീപത്തെ ബോംബാക്രമണത്തിൽ നൂറോളം പേർ കൊല്ലപ്പെട്ടതായാണ്​ കേൾക്കുന്നതെന്ന്​​ ശഹീൻ പറഞ്ഞു. റഷ്യയോടൊപ്പം ചേരാൻ​ നിൽക്കുന്ന രണ്ട്​ സ്​റ്റെയിറ്റുകളായ ഡൊണാസ്ക്​, ലുഹാൻസ്ക്​ എന്നിവ അവരുടെ അധീനതയിലായിട്ട്​ രണ്ടു ദിവസം കഴിഞ്ഞു. ഏറ്റുമുട്ടലുകളൊന്നുമില്ലാതെയാണ്​ അത്​ നടന്നത്​. അതുകൊണ്ടാണ്​ യുക്രെയിന്‍റെ മറ്റു ഭാഗങ്ങളിലുള്ളവർ യുദ്ധമുണ്ടാവില്ലെന്ന്​ കരുതിയിരുന്നത്​. രക്ഷിതാക്കൾ മടങ്ങണമെന്നാവശ്യപ്പെട്ടപ്പോഴും ഞാൻ അടക്കമുള്ളവർ ഇവിടെ തങ്ങിയതും ഈ ധാരണയിലാണ്​.

എന്നാൽ രണ്ടു പ്രദേശങ്ങളും പിടിച്ചെടുത്ത റഷ്യൻ സൈന്യം തിരിച്ചു പോകാത്തത്​ യുക്രെയിൻ മുഴുവൻ അധീനതയിലാക്കാൻ വേണ്ടിയാണെന്ന്​ തോന്നുന്നു. തലസ്ഥാന സഗരിയുടെ 20 ശതമാനം ഇതിനകം അവർ പിടിച്ചെടുത്തു. അതിർത്തി പ്രദേശങ്ങളിലെ കാർക്കീവ്​ പോലുള്ള രണ്ടോ മൂന്നോ സ്​റ്റെയിറ്റുകൾ റഷ്യ പിടിച്ചെടുത്തതായും കേൾക്കുന്നു. റഷ്യയുടെ അഞ്ച്​ യുദ്ധവിമാനങ്ങൾ യുക്രെയിൻ വെടിവെച്ചിട്ടുവെന്ന്​ പറയുന്നുണ്ടെങ്കിലും വൻ ശക്​തിയുടെ മുന്നിൽ പിടിച്ചു നിൽക്കാൻ യുക്രെയിന്​ സാധിക്കില്ലെന്ന്​ എല്ലാവർക്കും അറിയാം. എന്താണ്​ സംഭവിച്ചുകൊണ്ടിരിക്കുന്നതെന്ന്​ കൃത്യമായി അറിയാൻ ഒരു സംവിധാനവുമില്ല. ഇന്ത്യൻ എംബസിയുടെ അറിയിപ്പ്​ കിട്ടിയിരുന്നു. അതിലാകെയുള്ളത്​ ഫോൺ ചാർജ്​ ചെയ്ത്​ വെക്കണം, പവർ ബാങ്ക്​ കൈയിൽ കരുതണം, ഭക്ഷണം ശേഖരിച്ചുവെക്കണം തുടങ്ങിയ നിർദേശങ്ങളാണെന്നും ശഹീൻ പറഞ്ഞു.