വിസ കാലാവധി കഴിഞ്ഞു; ബംഗ്ലാദേശ് യുവതി റിമാൻഡിൽ

ചിറ്റൂർ: വിസ കാലാവധി കഴിഞ്ഞിട്ടും തിരികെ നാട്ടിലേക്ക് പോകാതിരുന്ന യുവതി അറസ്റ്റിൽ. ബംഗ്ലാദേശ് ഉത്തർകാലിയ സ്വദേശിനി റുമാ ബീഗമാണ് (37) അറസ്റ്റിലായത്. കൊഴിഞ്ഞാമ്പാറ നാട്ടുകൽ പാണംപള്ളത്ത് വാടക വീട്ടിൽ താമസിച്ച് വരുന്നതിനിടെയാണ് കൊഴിഞ്ഞാമ്പാറ പൊലീസ് ഫോറിനേഴ്സ് ആക്ട് പ്രകാരം അറസ്റ്റ് ചെയ്തത്.

ആലത്തൂർ എരുമയൂർ സ്വദേശി സുബൈർ എന്നയാളുടെ കൂടെ താമസിച്ചുവരുകയായിരുന്നു ഇവർ. കഴിഞ്ഞമാസം ആലത്തൂരിൽ മുളകുപൊടി എറിഞ്ഞ് നടത്തിയ മോഷണശ്രമത്തിൽ സുബൈർ അറസ്റ്റിലായിരുന്നു. തുടർന്ന് നടത്തിയ അന്വേഷണത്തിലാണ് ഇയാളുടെ കൂടെ താമസിച്ച യുവതിയെക്കുറിച്ച് വിവരം ലഭിക്കുന്നത്.

കൊഴിഞ്ഞാമ്പാറ എസ്.ഐ പി. സുജിത്തിന്‍റെ നേതൃത്വത്തിലെ സംഘം അറസ്റ്റ് ചെയ്ത് ആലത്തൂർ കോടതിയിൽ ഹാജരാക്കിയ യുവതിയെ റിമാൻഡ് ചെയ്ത് പാലക്കാട് ജില്ല ജയിലിലേക്ക് മാറ്റി. വിദേശകാര്യ മന്ത്രാലയത്തിന്‍റെ കൊച്ചിയിലെ ഓഫിസിൽ അറിയിപ്പ് നൽകിയിട്ടുണ്ടെന്നും കൊഴിഞ്ഞാമ്പാറ പൊലീസ് പറഞ്ഞു.