വിദ്യാർഥികൾക്ക് വൈറൽ പനി: കുസാറ്റ് ഹോസ്റ്റലുകൾ അടച്ചുപൂട്ടി

കൊച്ചി: നാല് വിദ്യാർഥികൾക്ക് വൈറൽ പനി പിടിപെട്ടതോടെ കുസാറ്റ് ഹോസ്റ്റലുകൾ അടച്ചുപൂട്ടി . ഈ മാസം 19 വരെയാണ് ഹോസ്റ്റലുകൾ അടച്ചിടുക. രോഗം പടരാതിരിക്കാനുള്ള മുൻകരുതലിന്റെ ഭാ​ഗമായാണ് ഹോസ്റ്റലുകൾ അടച്ചുപൂട്ടിയതെന്നാണ് കുസാറ്റ് അധികൃതർ പറയുന്നത്. അതേസമയം എച്ച് 3 എൻ 2 വ്യാപിക്കുന്ന സാഹചര്യത്തിൽ എല്ലാ സംസ്ഥാനങ്ങളും ജാ​ഗ്രത പുലർത്തണമെന്ന് കേന്ദ്ര ആരോ​ഗ്യ മന്ത്രാലയം മുന്നറിയിപ്പ് നൽകിയിരിക്കുകയാണ്.

രോ​ഗത്തെ കുറിച്ച് ജനങ്ങൾക്കിടയിൽ ബോധവത്കരണം നടത്തണം. രോ​ഗ വ്യാപനം സൂക്ഷ്മമായി നിരീക്ഷിക്കണം. ആശുപത്രി സൗകര്യങ്ങൾ വിലയിരുത്തണമെന്നും കേന്ദ്ര ആരോ​ഗ്യ സെക്രട്ടറി രാജേഷ് ഭൂഷണിന്റെ നേതൃത്വത്തിൽ നടന്ന യോ​ഗം നിർദേശിച്ചു. ഇൻഫ്ലുവൻസ വൈറസിന്‍റെ ഒരു വകഭേദമാണ് എച്ച്3 എൻ2. സാധാരണ പനിയിലും ചുമയിലും തുടങ്ങി, ന്യൂമോണിയയിലേക്കും ശ്വാസതടസ്സത്തിലേക്കും ഗുരുതരമായാൽ മരണത്തിലേക്കും വരെയെത്തും. എച്ച്3 എൻ2 പകരാതിരിക്കാൻ കൊവിഡിന് സമാനമായ മുൻകരുതലുകളാണ് സ്വീകരിക്കേണ്ടത്.