കോടതി ഉത്തരവ് ലംഘിച്ചു; വെള്ളാപ്പള്ളിയെ അറസ്റ്റ് ചെയ്യണമെന്ന് കോടതി

തിരുവനന്തപുരം: കോടതി ഉത്തരവ് ലംഘിച്ച കേസില്‍ കൊല്ലം നെടുങ്ങണ്ട എസ്.എന്‍ ട്രെയിനിങ്​ കോളജ് മാനേജരായ വെള്ളാപ്പളളി നടേശനെ അറസ്റ്റ് ചെയ്ത് കോടതിയില്‍ ഹാജരാക്കണമെന്ന് കോടതി. ഹരജിക്കാരനുണ്ടായ മാനസിക ബുദ്ധിമുട്ടുകള്‍ക്ക്, നാലാഴ്ചക്കകം അഞ്ചു ലക്ഷം രൂപ നഷ്ടപരിഹാരം നല്‍കണമെന്നും കോടതി ഉത്തരവ്. യൂനിവേഴ്‌സിറ്റി അപ്പലേറ്റ് ട്രൈബ്യൂണല്‍ ജഡ്ജി ജോസ് എന്‍. സിറിലിന്റേതാണ് ഉത്തരവ്.

എസ്.എന്‍ ട്രെയിനിങ്​ കോളജിലെ മലയാള വിഭാഗം അസോസിയേറ്റ് പ്രഫസറായ ഡോ.ആര്‍. പ്രവീണ്‍ ആണ്​ ഹരജിക്കാരന്‍. വ്യക്തമായ കാരണമില്ലാതെ പ്രവീണിനെ സസ്‌പെൻഡ്​ ചെയ്തിരുന്നു. ഇതിനെതിരെ ട്രൈബ്യൂണലിനെ സമീപിച്ച് വിധി സമ്പാദിച്ചെങ്കിലും തിരിച്ചെടുക്കാന്‍ മാനേജ്‌മെന്റ് തയാറായില്ല.

കോടതി ഉത്തരവ് നിലനില്‍ക്കെതന്നെ പ്രവീണിനെ സര്‍വിസില്‍നിന്ന് പിരിച്ചുവിടുകയും ചെയ്തു. വീണ്ടും പ്രവീണ്‍ കോടതിയെ സമീപിച്ച് നല്‍കിയ ഹരജിയിലാണ് കോടതി അറസ്റ്റ് വാറന്‍റ്​ പുറപ്പെടുവിച്ചത്. കോടതിയുടെ മുന്‍ ഉത്തരവ് ലംഘിച്ചു എന്നതിനപ്പുറം കോടതി ഉത്തരവ് പാലിക്കാതിരുന്നതിന് ക്ഷമാപണം പോലും നടത്താന്‍ തയാറായില്ലെന്നതാണ് കോടതിയെ ചൊടിപ്പിച്ചത്. ഹരജിക്കാരനുവേണ്ടി അഡ്വ. വെങ്ങാനൂര്‍ ജി. ശിവശങ്കരന്‍ ഹാജരായി.