എ.ഐ കാമറ ഇടപാടിൽ ഗതാഗത വകുപ്പിലെ പ്രവർത്തനങ്ങളിൽ വിജിലൻസ് അന്വേഷണം

തിരുവനന്തപുരം: എ.ഐ കാമറകൾ സ്ഥാപിച്ചതുൾപ്പെടെ ഗതാഗതവകുപ്പിലെ വിവിധ പ്രവർത്തനങ്ങൾ വിജിലൻസ് അന്വേഷിക്കുന്നു. ജോയന്റ് ട്രാൻസ്​പോർട്ട്​ കമീഷണറായിരുന്ന രാജീവൻ പുത്തലത്തിന് എതിരായ പരാതികളുടെ അടിസ്ഥാനത്തിലാണ്​ അന്വേഷണം. കഴിഞ്ഞവർഷം ലഭിച്ച പരാതിയിലെ ആരോപണങ്ങൾ പരിശോധിക്കാൻ സർക്കാർ വിജിലൻസിന് അനുമതി നൽകിയിരുന്നു. 2022 മേയിലാണ് വിജിലൻസ് ഇതുസംബന്ധി​ച്ച പ്രാഥമിക അന്വേഷണം ആരംഭിച്ചത്.

പ്രാഥമികാന്വേഷണത്തിൽ ആരോപണങ്ങളിൽ കഴമ്പുണ്ടെന്ന കണ്ടെത്തലിന്‍റെ അടിസ്ഥാനത്തിൽ കഴിഞ്ഞ ഫെബ്രുവരിയിൽ വിശദമായ അന്വേഷണത്തിന് മുഖ്യമന്ത്രി പിണറായി വിജയന്‍ നിർദേശം നൽകി. അതിന്‍റെ അടിസ്ഥാനത്തിൽ വിജിലൻസ്​ സ്​പെഷൽ യൂനിറ്റ്​- 2 എസ്​.പിയുടെ നേതൃത്വത്തിൽ അന്വേഷണം ആരംഭിക്കുകയായിരുന്നു.

രാജീവൻ പുത്തലത്തിന് എതിരെ സ്ഥലം മാറ്റം, ഉപകരണങ്ങൾ വാങ്ങൽ, മറ്റ്​ ഇടപാടുകൾ ഉൾപ്പെടെ ആറ്​ കാര്യങ്ങളിൽ ക്രമക്കേട്​ ആരോപിച്ചുള്ള പരാതിയാണ്​ വിജിലൻസിന്​ ലഭിച്ചത്​. പ്രാഥമിക അന്വേഷണത്തിൽ പരാതികളിൽ ചിലതിൽ കഴമ്പുണ്ടെന്ന് കണ്ടെത്തുകയായിരുന്നു. രാജീവൻ പുത്തലത്ത് കഴിഞ്ഞ വർഷം സർവിസിൽനിന്ന് വിരമിച്ചു. അദ്ദേഹം വിരമിക്കുന്നതിന് തൊട്ടുമുമ്പാണ്​ വിജിലൻസിന്​ പരാതികൾ ലഭിച്ചത്​. തുടർന്ന് പരാതികളിൽ വിജിലൻസ് അന്വേഷണം നടത്തി വിവരങ്ങൾ വിജിലൻസ് വകുപ്പിന് കൈമാറി. വിശദമായ അ​ന്വേഷണം വേണമെന്ന വിജിലൻസ്​ ഡയറക്ടറുടെ ശിപാർശയുടെ അടിസ്ഥാനത്തിലാണ്​ സർക്കാർ അനുമതി നൽകിയത്​.

സേഫ്​ കേരള പദ്ധതിയിലെ ക്രമക്കേടിനെക്കുറിച്ച്​ വിശദമായ അന്വേഷണം നടക്കും. രാജീവൻ പുത്തലത്തിന്​ പുറമെ കമീഷണര്‍ ഓഫിസിലെ ഒരു ക്ലർക്കിനെതിരെയും ആരോപണമുണ്ട്​. എ.ഐ കാമറകള്‍, ലാപ്​ടോപ്, വാഹനങ്ങള്‍ എന്നിവ വാങ്ങിയതില്‍ അഴിമതിയുണ്ടെന്ന്​ പരാതികൾ അന്വേഷണസംഘം പരിശോധിക്കും.

ഉദ്യോഗസ്ഥനെതിരെയുള്ള പരാതിയിലെ അന്വേഷണമാണെങ്കിലും എ.ഐ കാമറ ഇടപാടിലേക്കും ടെൻഡര്‍ നടപടികളിലേക്കും എങ്ങനെ എത്തി എന്നതടക്കമുള്ള കാര്യങ്ങള്‍ അന്വേഷണ വിഷയമാവും. അതേസമയം കാമറ സ്ഥാപിച്ചതുൾപ്പെടെ കാര്യങ്ങൾ ചെയ്തത്​ കെൽ​ട്രോൺ ആണെന്നും ടെൻഡർ നടപടികളില്‍ ഇടപെട്ടിട്ടില്ലെന്നും രാജീവൻ പുത്തലത്ത് പ്രതികരിച്ചു. സേഫ്​കേരള പദ്ധതി നടപ്പാക്കിയത്​ മുതൽ ആരോപണങ്ങളുണ്ടെന്നും താൻ തെറ്റൊന്നും ചെയ്തിട്ടില്ലെന്നും സത്യം തെളിയിക്കുമെന്നും അദ്ദേഹം കൂട്ടിച്ചേർത്തു.