തദ്ദേശീയ വിമാനവാഹിനി വിക്രാന്ത് സന്ദർശിച്ച്​ ഉപരാഷ്ട്രപതി

കൊച്ചി: കൊച്ചിൻ ഷിപ്​യാഡിൽ അന്തിമ നിർമാണഘട്ടത്തിലായ തദ്ദേശീയ വിമാനവാഹിനി വിക്രാന്ത് ഉപരാഷ്ട്രപതി എം. വെങ്കയ്യനായിഡു സന്ദർശിച്ചു. ആസാദി കാ അമൃത്​ മഹോത്സവ് ആഘോഷ ഭാഗമായി ആഗസ്റ്റിനുമുമ്പ്​ വിമാനവാഹിനി നിർമാണം പൂർത്തിയാക്കി നീറ്റിലിറക്കുന്നത്​ സംബന്ധിച്ച വിവരങ്ങൾ ഉപരാഷ്ട്രപതിക്ക് കപ്പൽശാല അധികൃതർ കൈമാറി. സ്വയംപര്യാപ്തതക്കുള്ള നമ്മുടെ പരിശ്രമങ്ങളുടെ തിളങ്ങുന്ന ഉദാഹരണമാണ് ഇതെന്ന്​ ഉപരാഷ്ട്രപ്രതി പ്രകീർത്തിച്ചു.

ഗവർണർ ആരിഫ് മുഹമ്മദ് ഖാൻ, ദക്ഷിണ നാവിക കമാൻഡ് ചീഫ് ഓഫ് സ്റ്റാഫ് റിയർ അഡ്മിറൽ ആന്‍റണി ജോർജ്, കൊച്ചിൻ ഷിപ്​യാഡ് ലിമിറ്റഡ് സി.എം.ഡി മധു എസ്. നായർ, നാവികസേനയിലെയും കൊച്ചിൻ ഷിപ്​യാഡ് ലിമിറ്റഡിലെയും ഉന്നത ഉദ്യോഗസ്ഥർ ഉപരാഷ്ട്രപതിയെ അനുഗമിച്ചു. നേരത്തെ ഉപരാഷ്ട്രപതിയോടുള്ള ആദരസൂചകമായി ഇന്ത്യൻ നാവികസേന കപ്പലായ ഗരുഡയിൽ 100 സേന അംഗങ്ങളുടെ പ്രത്യേക പരേഡ് നടന്നിരുന്നു. തദ്ദേശീയമായി യുദ്ധക്കപ്പലുകൾ നിർമിക്കാനുള്ള കഴിവ് സ്വായത്തമാക്കാൻ ഇന്ത്യൻ നാവികസേനയും കൊച്ചിൻ ഷിപ്​യാഡും നടത്തുന്ന പരിശ്രമങ്ങളെ ഉപരാഷ്ട്രപതി അഭിനന്ദിച്ചു.