യു.ഡി.എഫിനും ബി.ജെ.പിക്കും അധോഗതി; ബി.ഡി.ജെ.എസ്​ ഒന്നുമല്ലെന്ന് വെള്ളാപ്പള്ളി

തിരുവനന്തപുരം: കേരള രാഷ്ട്രീയത്തിൽ യു.ഡി.എഫിന് അധോഗതിയാണെന്നും ബി.ജെ.പി പോയെന്നും എസ്.​എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. തന്‍റെ മകൻ നേതൃത്വം നൽകുന്ന ബി.ഡി.ജെ.എസ്​ ഒന്നുമല്ലെന്നും വെള്ളാപ്പള്ളി പറഞ്ഞു. കേസരി സ്​മാരക ട്രസ്റ്റിന്‍റെ മീറ്റ്​ ദ പ്രസ്​ പരിപാടിയിൽ പ​ങ്കെടുക്കുകയായിരുന്നു അദ്ദേഹം.

കേരളത്തിൽ ബി.ജെ.പിയുടെ അടിസ്ഥാനം സവർണന്‍റേതാണ്​. ബി.ജെ.പി പിന്നാക്കക്കാരെ മത്സരത്തിനിറക്കിയ ഒരിടത്തും സവർണർ വോട്ട് ചെയ്തില്ല. കേരളം ഭരിക്കാൻ കൊള്ളാവുന്ന കരുത്തനായ മുഖ്യമന്ത്രിയാണ്‌ പിണറായി വിജയൻ. രാഷ്ട്രീയലക്ഷ്യമിട്ട്‌ കേരളത്തിൽ നടത്തിയ സമരങ്ങൾ എങ്ങുമെത്തിയില്ല. ചില താൽപര്യങ്ങൾക്ക്‌ വേണ്ടി വിവാദങ്ങളുണ്ടാക്കിയിട്ടും ജനം ഇടതുപക്ഷത്തിനൊപ്പം നിന്നു​.

ശബരിമലസമരം നിർഭാഗ്യകരമായ ഒന്നായിരുന്നു. എന്തിന്‌ വേണ്ടിയായിരുന്നു ആ സമരം. പത്ത്‌ ആളെക്കിട്ടുമെന്ന്‌ കണ്ട്‌ ചാടിയതാണ്‌. മൂന്ന്​ തമ്പുരാന്മാരുണ്ടാക്കിയ സമരം ഒരു രാഷ്ട്രീയപാർട്ടി ഏറ്റെടുത്തിട്ട് എന്തായി. പാവപ്പെട്ട ജനങ്ങളുടെ മനസ്സ്‌ പെൻഷനും കിറ്റും നൽകിയ പിണറായി സർക്കാറിനൊപ്പമായിരുന്നു. ഇന്ത്യൻ രാഷ്ട്രീയത്തിൽ നശിച്ചു കൊണ്ടിരിക്കുന്ന പാർട്ടിയാണ്​ കോൺഗ്രസ്​. അനാഥപ്രേതമായി കോൺഗ്രസ്‌ മാറി. കേരളത്തിൽ വന്നവനും പോയവനുമെല്ലാം കോൺഗ്രസിൽ ഗ്രൂപ്പുണ്ടാക്കി.

കെ. സുധാകരൻ കെ.പി.സി.സി പ്രസിഡന്‍റായതോടെ പുതിയ ഒരു ഗ്രൂപ്പുകൂടി ഉണ്ടായി. പ്രസിഡന്‍ററായി വന്നവരെല്ലാം ഗ്രൂപ്പുണ്ടാക്കിയതല്ലാതെ കോൺഗ്രസിന് ഗുണമുണ്ടായില്ല. ഇനിയും കേരളത്തിൽ തുടർഭരണം വരും. കേരളത്തിൽ വർഗീയ ധ്രുവീകരണം ശക്തമായിട്ടുണ്ട്​. എൻ.എസ്.​എസുമായുള്ള ഐക്യം ചത്തകുട്ടിയാണ്​. സുകുമാരൻ നായർക്ക്‌ തമ്പ്രാൻ മനോഭാവമാണ്‌. അതുമായി യോജിക്കാനാകില്ല. എസ്‌.എൻ.ഡി.പി യോഗം തെരഞ്ഞെടുപ്പ്‌ നടത്താൻ ഒരുക്കമാണ്​. വഖഫ്‌ ബോർഡ്‌ നിയമനം പി.എസ്‌.സിക്ക്‌ വിടേണ്ടതില്ലെന്നും വെള്ളാപ്പള്ളി പറഞ്ഞു.