ക്ഷേത്രങ്ങളിൽ സവർണ മേധാവിത്വം -വെള്ളാപ്പള്ളി

ഹരിപ്പാട്: ക്ഷേത്രങ്ങളിൽ സവർണ മേധാവിത്വമാണ് നിലനിൽക്കുന്നതെന്ന്​ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. ദേവസ്വം ബോർഡിൽ നിന്ന്​ 90 ശതമാനം ശമ്പളവും കൊണ്ടു പോകുന്നത് മുന്നാക്കക്കാരാണ്. എസ്.എൻ.ഡി.പി യോഗം ചേപ്പാട് യൂനിയൻ ദശാബ്​ദിയാഘോഷ മഹാസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

പിന്നാക്കക്കാരന്​ ശാന്തി നിയമനം ലഭിച്ചിട്ടും നിയമം ബാധകമല്ലെന്ന രീതിയിൽ അടിച്ചിറക്കുന്നു. ന്യൂനപക്ഷമായ സവർണർ മഹാഭൂരിപക്ഷം വരുന്ന അവർണരെ ഭരിക്കുന്നു​. ആവശ്യങ്ങൾ വരുമ്പോൾ മാത്രം സംഘടിക്കാതെ എല്ലായ്പ്പോഴും ഒരുമിച്ച്​ നിൽക്കണം. സാമുദായിക സമാഹരണത്തിലൂടെ മാത്രമാണ്​ സാമൂഹികനീതി നേടാൻ സാധിക്കുകയാണെന്നും വെള്ളാപ്പള്ളി വ്യക്തമാക്കി.