മുഖ്യമന്ത്രിക്കുചുറ്റും സവർണ ഉപജാപകവൃന്ദം -വെള്ളാപ്പള്ളി

ആലപ്പുഴ: മുഖ്യമന്ത്രി പിണറായി വിജയനുചുറ്റും സവർണ ഉപജാപകവൃന്ദം പ്രവർത്തിക്കുന്നതായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. അവരുടെ സമ്മർദമാണ് ദേവസ്വം ബോർഡിലെ മുന്നാക്കസംവരണത്തിന്​ പിന്നിലെന്നും വാർത്തസമ്മേളനത്തിൽ അദ്ദേഹം ആരോപിച്ചു.  പിണറായിക്ക്​ ചിന്തിക്കാൻപോലും അവസരം കൊടുക്കാതെ കുട്ടനാട്ടിലെ ചാണ്ടി വിഷയമെന്ന കലക്കവെള്ളത്തിനിടക്ക് ഇത്രയും പെ​െട്ടന്ന് ഈ മീൻ പിടിച്ചുകൊണ്ടുപോകാൻ കാര്യമെന്താണ്. ഇതിൽ ഒരുന്യായവുമില്ല. കുടിലതന്ത്രമാണ് സവർണവിഭാഗം അവിടെ പ്രയോഗിച്ചത്. അംബേദ്കർ എഴുതിയ ഭരണഘടനയിൽ സാമ്പത്തികസംവരണം പറഞ്ഞിട്ടില്ല.  

സംവരണവിഷയത്തിൽ സമുദായത്തെ വിളിച്ചുകൂട്ടി സംസാരിക്കാൻ തയാറായിരു​െന്നങ്കിൽ പിണറായി തീർച്ചയായും ഇത് പ്രഖ്യാപിക്കില്ലായിരുന്നു. അയിത്തം കൽപിച്ച് തങ്ങളെ അകറ്റിനിർത്തുകയാണ് ചെയ്തത്. ഇടതുപക്ഷത്തുനിന്ന് ഇത്​ പ്രതീക്ഷിച്ചിരുന്നില്ല. സർക്കാർ നീക്കത്തെ രാഷ്​ട്രീയമായും നിയമപരമായും നേരിടും. പഠിക്കാതെയാണ് നേതാക്കൾ തീരുമാനം എടുത്തത്. ഇടതും വലതും മാറി ഭരിച്ചിട്ടും ക്ഷേത്രത്തി​​െൻറ കാര്യം വരുമ്പോൾ എല്ലാവരും ഒരേ തൂവൽപക്ഷികളായി മാറുകയാണെന്നും അദ്ദേഹം പറഞ്ഞു. 

സർക്കാർ അനാസ്ഥ ഉണ്ടായിട്ടില്ല
ഓഖി ദുരന്തത്തിൽ സർക്കാർ ഭാഗത്തുനിന്ന് കുറ്റകരമായ അനാസ്ഥ ഉണ്ടായിട്ടില്ലെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. സർക്കാറിനെകൊണ്ട് ചെയ്യാവുന്നതെല്ലാം ചെയ്യുന്നുണ്ട്. പ്രശ്നം രാഷ്​ട്രീയവളർച്ചക്ക്​ ചിലർ ഉപയോഗിക്കുകയാ​െണന്നും അദ്ദേഹം വാർത്തസമ്മേളനത്തിൽ പറഞ്ഞു. ദുരന്തത്തിന് ഇരയായവരെ സർക്കാർ പരമാവധി സഹായിക്കുന്നുണ്ട്. മരിച്ച മത്സ്യത്തൊഴിലാളികളുടെ കുടുംബങ്ങളെ കരുണയോടെ കാണണം. അതിന്​ കൂട്ടായ ചർച്ച നടത്തി യോജിച്ച് പരിഹാരം കാണാൻ ശ്രമിക്കണം. മരണത്തെപോലും രാഷ്​ട്രീയവത്കരിക്കുന്നത് അഭികാമ്യമല്ല. കൂട്ടായ്മയോടെയുള്ള പ്രവർത്തനമാണ്​ ഉണ്ടാവേണ്ടത്​. അതിനുപകരം ഭരണ, പ്രതിപക്ഷങ്ങൾ പരസ്പരം കുറ്റം പറയുകയാണ്​ -അദ്ദേഹം പറഞ്ഞു.