മുഖ്യമന്ത്രിക്കെതിരെ സ്വപ്ന സ്വപ്നം കണ്ട്​ ഓരോന്ന്​ പറയുകയാണെന്ന് വെള്ളാപ്പള്ളി

ആലപ്പുഴ: കേരളം പിടിക്കുമെന്ന മോദിയുടെ ആഗ്രഹം സ്വാഭാവികമാണെന്ന്​ എസ്​.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. ചേർത്തലയിൽ മാധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം. ഭരിക്കുന്ന എല്ലാ രാഷ്ട്രീയ നേതാക്കളും അവരുടെ അധികാരം ഉറപ്പിക്കുമെന്ന്​ പറയുന്നത്​ സ്വാഭാവികമാണ്​. അതിനെ എതിർത്തിട്ട്​ കാര്യമില്ല.

ത്രിപുരയിൽ കോൺഗ്രസും മാർക്സിസ്​റ്റ്​ പാർട്ടിയും യോജിച്ചപ്പോൾ ഭരണമുറപ്പിക്കുമെന്നാണ് പറഞ്ഞത്​. രണ്ടുപേരും ചേർന്നുള്ള ത്രിപുര​ മോഡൽ സഖ്യം കേരളത്തിൽ ഉണ്ടാകില്ല. കോൺഗ്രസും കമ്യൂണിസ്റ്റ്​ പാർട്ടിയും യോജിക്കണ​മെന്ന ആശയം പണ്ടുമുതൽ ഉള്ളതാണ്​. അത്​ പ്രായോഗിക തലത്തിൽ ത്രിപുരയിൽ പരീക്ഷിച്ചപ്പോൾ നഷ്ടംവന്നത്​​ കമ്യൂണിസ്റ്റ്​ പാർട്ടിക്കാണ്​. കോൺഗ്രസിന്​​ ചെറിയ നേട്ടമുണ്ടായി.

ആലപ്പുഴയിലെ സി.പി.എമ്മിൽ സംഭവിക്കാൻ പാടില്ലാത്ത കാര്യങ്ങളാണ്​ നടക്കുന്നത്​. മയക്കുമരുന്ന്​ കേസിൽ പ്രതിയായ ആളുകളെ പാർട്ടി സംരക്ഷിക്കു​ന്നുവെന്ന സത്യം അണികൾക്കിടയിലുണ്ട്​. അത്​ പറയാൻ പലരും മടിക്കുകയാണ്​. മുഖ്യമന്ത്രിക്കെതിരായ സ്വപ്നയുടെ ആരോപണങ്ങൾ ആരും വിശ്വസിക്കില്ല. സ്വപ്ന സ്വപ്നംകണ്ട്​ ഓരോന്ന്​ പറയുകയാണ്​. ആദ്യംപറഞ്ഞതല്ല ഇപ്പോൾ പറയുന്നത്​. അതിനൊന്നും മറുപടി പറയേണ്ടതില്ലെന്നും അദ്ദേഹം പറഞ്ഞു.