തൊണ്ടിയായി പിടിച്ച, അവകാശികളില്ലാത്ത വാഹനങ്ങൾ പൊലീസിന് നൽകണമെന്ന്

തിരുവനന്തപുരം: തൊണ്ടിയായി പിടിച്ച, അവകാശികളില്ലാത്ത വാഹനങ്ങൾ പൊലീസിന് നൽകണമെന്ന ആവശ്യവുമായി സംസ്ഥാന പൊലീസ്​ മേധാവി. ഇക്കാര്യം ചൂണ്ടിക്കാട്ടി ഡി.ജി.പി സർക്കാറിന്​ കത്ത് നൽകി.

സംസ്​ഥാനത്തെ പൊലീസ്​ സ്​റ്റേഷൻ പരിസരങ്ങളിൽ ആയിരക്കണക്കിന്​ തൊണ്ടി വാഹനങ്ങളാണ്​ നശിക്കുന്നത്​. ചിലതിന്​ അവകാശികളില്ല. അത്തരം വാഹനങ്ങൾ പൊലീസ് ആവശ്യത്തിന് ഉപയുക്തമാക്കണമെന്നാണ്​ കത്തിലെ ആവശ്യം​​. നേരത്തെ ചീഫ്​ സെക്രട്ടറി പ​ങ്കെടുത്ത യോഗത്തിൽ ഡി.ജി.പി ഈ ആവശ്യം ഉന്നയിച്ചിരുന്നു. പിന്നാലെയാണ്​ കത്ത്​ കൈമാറിയത്.

15 വർഷ കാലാവധി പൂർത്തിയാക്കിയ 250-300 പൊലീസ്​ വാഹനങ്ങളാണ്​ പ്രതിവർഷം പൊളിക്കുന്നത്​. ഇവക്ക്​ പകരം അത്രത്തോളം​ വാഹനങ്ങൾ​ സേനക്ക്​ ലഭിക്കുന്നില്ല. സർക്കാറിന്‍റെ സാമ്പത്തിക പ്രതിസന്ധി മൂലം​ പുതിയ വാഹനങ്ങൾ വാങ്ങാനുമാകുന്നില്ല. ഇതടക്കം മുൻനിർത്തിയാണ്​ ഈ നിലക്കുള്ള ആവശ്യം ഉന്നയിച്ചത്. കോടതിയുടേതടക്കം പരിഗണനയിലുള്ള വിഷയമായതിനാൽ ഡി.ജി.പിയുടെ നിർദേശം വേഗം നടപ്പാക്കാനാവില്ലെന്നാണ്​ വിവരം.