കോവിഡ്​ സംബന്ധിച്ച വിവരങ്ങൾ എന്തിനാണ്​ സർക്കാർ മറച്ചുവെക്കുന്നതെന്ന്​ വി.ഡി സതീശൻ

കോവിഡ്​ സംബന്ധിച്ച ഡാറ്റ (വിവരങ്ങൾ) എന്തിനാണ്​ സർക്കാർ മറച്ചുവെക്കുന്നതെന്ന്​ പ്രതിപക്ഷ നേതാവ്​ വി.ഡി സതീശൻ. അത്തരം വിവരങ്ങൾ പുറത്തുവന്നാൽ മാത്രമാണ്​ അത്​ വിശകലനം ചെയ്​ത്​ അടുത്ത തരംഗം തടയാനുള്ള തന്ത്രങ്ങൾ ആവിഷ്​കരിക്കുക. സ്വകാര്യ മേഖലയിലും പൊതു മേഖലയിലുമുള്ള ഗവേഷണ സ്​ഥാപനങ്ങളും മറ്റും ആ വിവരങ്ങളുടെ അടിസ്​ഥാനത്തിലാണ്​ പുതിയ തന്ത്രങ്ങൾ ആവിഷ്​കരിക്കുക. മറ്റു സംസ്​ഥാനങ്ങൾ അങ്ങിനെയാണ്​ ചെയ്​തതെന്നും പ്രതിപക്ഷ നേതാവ്​ ചൂണ്ടികാട്ടി.

അവലോകന യോഗത്തിന്‍റെ മിനുറ്റ്​സ്​ പോലും സർക്കാർ മറച്ചുവെക്കുകയാണ്​. വിദഗ്​ധ സമിതി അംഗങ്ങൾക്ക്​ പോലും സർക്കാറിന്‍റെ നടപടികളെ കുറിച്ച്​ എതിരഭിപ്രായമുണ്ട്​. അതു പുറത്തുവരാതിരിക്കാനാണ്​ വിവരങ്ങൾ മറച്ചു​വെക്കുന്നതെന്നും അദ്ദേഹം പറഞ്ഞു.

കേരളത്തിലെ കോവിഡ്​ പ്രതിരോധം പരാജയപ്പെട്ടിരിക്കുകയാണ്​. പരിശോധനകൾ പൂർണമായ​ും ആർ.ടി.പി.സി.ആറിലേക്ക്​ മാറണം. മറ്റു സംസ്​ഥാനങ്ങളെല്ലാം ആർ.ടി.പി.സി.ആറിനെ മാത്രമാണ്​ ആശ്രയിക്കുന്നത്​. ആന്‍റിജൻ ടെസ്റ്റ്​ വിശ്വസനീയമല്ലെന്നും കേരളത്തിൽ 30 ശതമാനം മാത്രമാണ്​ ആർ.ടി.പി.സി.ആർ ചെയ്യുന്നതെന്നും പ്രതിപക്ഷ നേതാവ്​ പറഞ്ഞു.