ഐക്യത്തോടെ നയിക്കാൻ സതീശന്​ രാഹുലി​െൻറ നിർദേശം

ന്യൂഡൽഹി: ഗ്രൂപ്പിന്​ അതീതമായി പാർട്ടി താൽപര്യങ്ങൾ ഉയർത്തിപ്പിടിച്ച്​ മുന്നോട്ടു പോകാൻ പ്രതിപക്ഷ നേതാവ്​ വി.ഡി. സതീശന്​ കോൺഗ്രസ്​ നേതാവ്​ രാഹുൽ ഗാന്ധിയുടെ നിർദേശം. പ്രതിപക്ഷ ​േനതാവായ ശേഷം ദേശീയ നേതാക്കളുമായി സൗഹൃദ കൂടിക്കാഴ്​ചക്ക്​ ഡൽഹിയിലെത്തിയതായിരുന്നു സതീശൻ. ഐക്യത്തോടെ നിയമസഭയിലും പുറത്തും പാർട്ടിയെ നയിക്കാൻ രാഹുൽ നിർദേശിച്ചു.

സൗഹൃദ സന്ദർശനത്തിനപ്പുറം, പാർട്ടി കാര്യങ്ങളൊന്നും ചർച്ചയായില്ലെന്ന്​ വി.ഡി. സതീശൻ പിന്നീട്​ മാധ്യമ പ്രവർത്തകരോട്​ പറഞ്ഞു. അത്തരമൊരു ദൗത്യം ത​െൻറ യാത്രക്ക്​ ഉണ്ടായിരുന്നില്ലെന്നും അദ്ദേഹം കൂട്ടി​ച്ചേർത്തു. കോൺഗ്രസിൽ ഗ്രൂപ്​ ഒരു യാഥാർഥ്യമാണ്​. അത്​ ഇല്ലാതാക്കാനല്ല ശ്രമം. അതേസമയം, ഗ്രൂപ്പുകൾ പാർട്ടിയെ വിഴുങ്ങുന്ന വിധം അതിപ്രസരം ഉണ്ടാകാൻ പാടില്ല.

രാഹുൽ ഗാന്ധിക്കു പുറമെ എ.കെ. ആൻറണി, കെ.സി. വേണുഗോപാൽ, താരിഖ്​ അൻവർ, മുകുൾ വാസ്​നിക്​ എന്നിവരുമായി ചർച്ച നടത്തി വി.ഡി. സതീശൻ നാട്ടിലേക്ക്​ മടങ്ങി. കെ.പി.സി.സി പുനഃസംഘടന, യു.ഡി.എഫ്​ കൺവീനർ കാര്യങ്ങൾ ചർച്ച ചെയ്യാൻ ബുധനാഴ്​ച കെ.പി.സി.സി രാഷ്​ട്രീയകാര്യ സമിതി യോഗം നടക്കാനിരിക്കേ, കൂടിക്കാഴ്​ചകളിൽ അക്കാര്യങ്ങളിൽ അനൗപചാരിക ചർച്ച നടന്നു. രാഹുൽ ഗാന്ധി താൽപര്യപ്പെട്ട പ്രകാരം മുതിർന്ന നേതാവ്​ ഉമ്മൻ ചാണ്ടി വ്യാഴാഴ്​ച ഡൽഹിയിലെത്തും.