രാജ്യത്തിന്‍റെ അഭിമാനം വാനോളം ഉയർത്തിയ ശാസ്ത്രജ്ഞർക്ക് അഭിനന്ദനം -വി.ഡി സതീശൻ

തിരുവനന്തപുരം: ചന്ദ്രയാൻ 3 പേടകം ചന്ദ്രനിൽ വിജയകരമായി സോ​ഫ്റ്റ് ലാ​ൻ​ഡി​ങ് നടത്തിയതിൽ ശാസ്ത്രജ്ഞരെ അഭിനന്ദിച്ച് പ്രതിപക്ഷ നേതാവ് വി.ഡി സതീശൻ. ലോകത്തിന് മുന്നിൽ രാജ്യത്തിന്റെ അഭിമാനം വാനോളം ഉയർത്തിയ ശാസ്ത്രജ്ഞർക്ക് അഭിനന്ദനമെന്ന് സതീശൻ ഫേസ്ബുക്കിൽ കുറിച്ചു.

ഫേസ്ബുക്ക് പോസ്റ്റിന്‍റെ പൂർണരൂപം:

ചന്ദ്രന്റെ ദക്ഷിണധ്രുവം തൊട്ട ആദ്യ രാജ്യമായി ഇന്ത്യ. ചന്ദ്രനിൽ സോഫ്റ്റ് ലാൻഡിങ് നടത്തുന്ന നാലാമത്തെ രാജ്യമാകുന്നു നമ്മുടേത്. ഓരോ ഭാരതീയനും അഭിമാനം കൊണ്ട് ചന്ദ്രനെ തൊടുന്ന അന്തരീക്ഷം. ഇതൊരു ഐതിഹാസിക നിമിഷമാണ്. ചന്ദ്രനിൽ ഇന്ത്യ ഉദിക്കുമ്പോൾ, ത്രിവർണ പതാക പാറുമ്പോൾ ഐ.​എ​സ്.​ആ​ർ.​ഒ​ക്ക് അഭിമാന നിമിഷമാണ്. ലോകത്തിന് മുന്നിൽ രാജ്യത്തിന്റെ അഭിമാനം വാനോളം ഉയർത്തിയ ശാസ്ത്രജ്ഞർക്ക് അഭിനന്ദനം. രാഷ്ട്ര ശിൽപികളുടെ ദീർഘവീക്ഷണത്തിന് ആദരവ്.