ഉയർന്ന ഉദ്യോഗസ്ഥർക്ക് വന്ദേഭാരതിൽ യാത്രബത്ത അനുവദിക്കാൻ തീരുമാനം

തിരുവനന്തപുരം: അഖി​ലേന്ത്യ സർവിസ്​ ഉദ്യോഗസ്ഥർക്കും സംസ്ഥാന സർവിസിലെ ​ഗ്രേഡ്​ ഒന്ന്​ ഉദ്യോഗസ്ഥർക്കും ഔദ്യോഗിക ആവശ്യങ്ങൾക്ക്​ വന്ദേഭാരതിൽ യാത്രബത്ത അനുവദിക്കും. കെ.എസ്​.ആർ ചട്ട പ്രകാരം വന്ദേഭാരതിലെ യാത്ര അനുവദനീയമായിരുന്നില്ല. ഇത്​ വേണമെന്ന ശിപാർശ പരിഗണിച്ചാണ്​ നടപടി.

77200-140500ഉം അതിന്​ മുകളിലും ശമ്പള സ്കെയിൽ ഉള്ളവർക്ക്​ വന്ദേഭാരതിന്‍റെ എക്സിക്യൂട്ടിവ്​ ചെയറിൽ യാത്രബത്ത അനുവദിക്കും. 77200-140500ന്​ താഴെയുള്ള ഗ്രേഡ്​ ഒന്ന്​ ഉദ്യോഗസ്ഥർക്ക്​ ചെയർകാറിലും യാത്ര നടത്താം.

വന്ദേഭാരത്​ യാത്രയുടെ ഭാഗമായി വരുന്ന കാറ്ററിങ്​ ചാർജ്​, ഇൻഷുറൻസ്​ പ്രീമിയം എന്നിവ അനുവദനീയമല്ല. ​യാത്ര ടിക്കറ്റുകളുടെ അസൽ ബില്ലിനൊപ്പം സമർപ്പിക്കണമെന്നും ധന വകുപ്പിന്‍റെ ഉത്തരവിൽ പറയുന്നു.