മഹല്ല് കമ്മിറ്റിയും നാട്ടുകാരും കൈകോർത്തു; വൈഷ്ണവിക്ക്​ മംഗല്യസൗഭാഗ്യം

ചെർപ്പുളശ്ശേരി (പാലക്കാട്​): മഹല്ല് കമ്മിറ്റിയുടെയും നാട്ടുകാരുടെയും തണലിൽ വൈഷ്ണവിക്ക്​ പുതുജീവിതം. അച്ഛനും അമ്മയും വേർപിരിഞ്ഞതോടെ അനാഥാലയത്തിൽ കഴിയേണ്ടി വന്ന തൃക്കടീരി പൂതക്കാട് തെറ്റിലിങ്ങൽ വൈഷ്ണവിയുടെ വിവാഹമാണ്​ പൂതക്കാട് അൽബദ്ർ മഹല്ല് കമ്മിറ്റിയുടെയും പ്രാദേശിക കൂട്ടായ്മയുടെയും സഹകരണത്തോടെ ഞായറാഴ്ച നടന്നത്​. 

വൈഷ്ണവിയുടെ ബന്ധു പാർവതിയുടെ വീട്ടിലായിരുന്നു വിവാഹം. ഒറ്റപ്പാലം മായന്നൂർ സ്വദേശി ഉണ്ണികൃഷ്ണനാണ് വരൻ. പ്ലസ് ടു കഴിഞ്ഞ് നഴ്​സിങ്ങിന്​ പഠിക്കുകയാണ് വൈഷ്ണവി. വിവാഹം ശരിയായപ്പോൾ മഹല്ല് കമ്മിറ്റിയെ സമീപിച്ചതോടെ അവർ ഏറ്റെടുക്കുകയായിരുന്നു. 

മഹല്ല് കമ്മിറ്റി രക്ഷാധികാരി ജമാലുദ്ദീൻ ഫൈസി ചെയർമാനും ഒറ്റപ്പാലം ബ്ലോക്ക്‌ പഞ്ചായത്ത്‌ സ്​റ്റാൻഡിങ്​ കമ്മിറ്റി ചെയർമാൻ ടി. കുട്ടികൃഷ്ണൻ കൺവീനറായും സിവിൽ പൊലീസ് ഓഫിസർ റഫീഖ് ട്രഷററായും സമിതി രൂപവത്​കരിച്ച്​ ആഭരണം, ഭക്ഷണം തുടങ്ങിയ മുഴുവൻ ചെലവുകളും വഹിക്കാൻ തീരുമാനിച്ചു. നാട്ടുകാരുടെ പൂർണ സഹകരണത്തോടെ ആഭരണങ്ങളും ഭക്ഷണവുമുൾപ്പെടെ മുഴുവൻ ചെലവും കണ്ടെത്തി. 

മഹല്ല് ഭാരവാഹികളായ കമ്മുണ്ണി ഹാജി, ഹൈദർ ഹാജി, കുഞ്ഞുമൊയ്തു ഹാജി എന്നിവർ ചെർപ്പുളശ്ശേരി എസ്​.ഐ ബാബുരാജി​​െൻറ സാന്നിധ്യത്തിൽ കുടുംബത്തിന്​ ആഭരണങ്ങൾ കൈമാറി. ചടങ്ങിന് സമിതി ഭാരവാഹികളായ ടി. കുട്ടികൃഷ്​ണൻ, സൈതലവി, റഫീഖ്, ഇർഷാദ് ഉസൈൻ, പങ്കജാക്ഷൻ, അബ്​ദുറസാഖ്​​​ അൽ ഫത്തനി തുടങ്ങിയവർ നേതൃത്വം നൽകി. വധൂവരന്മാർ മുഖ്യമന്ത്രിയുടെ ദുരിതാശ്വാസ നിധിയിലേക്ക് 5000 രൂപ എസ്.ഐക്ക്​ കൈമാറി. പൂതക്കാ​ട്ടെ ജീവകാരുണ്യ പ്രവർത്തനങ്ങളിൽ സജീവമാണ് മഹല്ല് കമ്മിറ്റി.