കെ.എസ്​.ആർ.ടി.സി ജീവനക്കാർക്ക് വാക്​സിൻ; വ്യാഴാഴ്​ച രജിസ്‌ട്രേഷൻ ആരംഭിക്കും

തിരുവനന്തപുരം: കെ.എസ്​.ആർ.ടി.സി ജീവനക്കാരെ മുൻ​ഗണനാവിഭാ​ഗത്തിൽ ഉൾപ്പെടുത്തി വാക്സിൻ നൽകാൻ സർക്കാർ ഉത്തരവ്. ഇതി​െൻറ അടിസ്ഥാനത്തിൽ 18 - 44 വയസിന് മധ്യേയുള്ള അർഹരായ ജീവനക്കാർക്ക് ഉടൻ വാക്സിൻ ലഭ്യമാക്കുമെന്ന് സി.എം.ഡി ബിജുപ്രഭാകർ അറിയിച്ചു.

യൂനിറ്റ് അടിസ്ഥാനത്തിലാണ് വാക്​സിൻ നൽകുക. യൂനിറ്റുകളിലും ചീഫ് ഓഫിസുകളിലും നോഡൽ അസിസ്​റ്റൻറിനെ ഇതിന്​ ചുമതലപ്പെടുത്തും. കോവിഡ് പോസിറ്റിവ് ആയവർ നെ​ഗറ്റിവ് ആയി ആറാഴ്ചക്ക് ശേഷമേ വാക്സിൻ നൽകൂ.

വ്യാഴാഴ്​ച രജിസ്‌ട്രേഷൻ നടപടി ആരംഭിക്കും. കണ്ടക്ടർ, ഡ്രൈവർ, മെക്കാനിക്കൽ, മിനിസ്​റ്റീരിയൽ സ്​റ്റാഫ് എന്ന മുൻ​ഗണനാക്രമത്തിലാകും വാക്സിൻ ലഭ്യമാക്കുക.