കളമശേരി സ്ഫോടനത്തിന് പിന്നിൽ പ്രവർത്തിച്ചവരെ ഉടൻ കണ്ടെത്ത​ണമെന്ന് വി. മുരളീധരൻ

തിരുവനന്തപുരം: കൊച്ചി കളമശേരി കൺവെൻഷൻ സെൻ്ററിൽ ഉണ്ടായ സ്ഫോടനം നടുക്കമുണ്ടാക്കുന്നതെന്ന് കേന്ദ്രമന്ത്രി വി. മുരളീധരൻ. ആളുകൾക്ക് ജീവൻ നഷ്ടപ്പെടുന്ന സാഹചര്യം അസ്വസ്ഥത ഉണ്ടാക്കുന്നു. സ്ഫോടനത്തിന് പിന്നിൽ പ്രവർത്തിച്ചവരെ ഉടൻ കണ്ടെത്ത​ണമെന്നും കേന്ദ്രമന്ത്രി തിരുവനന്തപുരത്ത് പറഞ്ഞു.

പ്രഥമ പരിഗണന കൊടുക്കേണ്ടത്, പരിക്കേറ്റവരുടെ ചികിത്സക്കാണ്. ഇതുമായി ബന്ധപ്പെട്ട് മുഖ്യമന്ത്രിയുമായി ഫോണിൽ സംസാരിച്ചു. ക്രൈസ്തവ കൂട്ടായ്മകൾക്കെതിരെ ഇത്തരം ആക്രമണം നടത്തിയത് ആ​രാണെന്ന് പുറന്ന് വരേണ്ടതുണ്ട്. ആഭ്യന്തര മന്ത്രി അമിത്ഷാ കേന്ദ്ര അന്വേഷണ ഏജൻസികളെ നിയോഗിച്ച് കഴിഞ്ഞതായും വി. മുരളീധരൻ പ്രതികരിച്ചു.

സമ്മേളനം നടക്കുന്ന സ്ഥലത്തെക്കുറിച്ച് സംസ്ഥാന സർക്കാർ ഏജൻസികൾക്ക് മുന്നറിയിപ്പ് ഉണ്ടായിരുന്നോ, എന്ത് നടപടികൾ സ്വീകരിച്ചിരുന്നുവെന്നതൊക്കെ പിന്നീട് പുറത്ത് വരുമെന്നും അദ്ദേഹം പറഞ്ഞു.