പാലാരിവട്ടം പാലം അഴിമതി; ഇബ്രാഹിംകുഞ്ഞിന്​ ജാമ്യമില്ല

കൊച്ചി: പാലാരിവട്ടം മേൽപാലം അഴിമതിക്കേസില്‍ വിജിലന്‍സ് അറസ്​റ്റ്​ ചെയ്ത മുന്‍ മന്ത്രി വി.കെ. ഇബ്രാഹീംകുഞ്ഞ്​ എം.എൽ.എക്ക്​ ജാമ്യമില്ല. ഗുരുതര ആരോഗ്യപ്രശ്നങ്ങൾ കണക്കിലെടുത്ത് ജാമ്യം അനുവദിക്കണമെന്നാവശ്യപ്പെട്ട് അദ്ദേഹം നൽകിയ ഹരജി ജസ്​റ്റിസ് പി.വി. കുഞ്ഞികൃഷ്ണൻ തള്ളി. അർബുദ ബാധിതനായി സ്വകാര്യ ആശുപത്രിയിൽ കഴിയുന്ന ഇബ്രാഹീംകുഞ്ഞി​െൻറ ചികിത്സ തുടര​ട്ടെയെന്നും നില മെച്ചപ്പെട്ടശേഷം ഡിസ്ചാർജ്​ ചെയ്ത് ജയിലിലേക്ക് മാറ്റുന്ന ഘട്ടത്തിൽ വീണ്ടും ജാമ്യഹരജി നൽകാമെന്നും കോടതി വ്യക്തമാക്കി.

നവംബർ 18നാണ്​ ​സ്വകാര്യ ആശുപത്രിയിൽവെച്ച്​ അദ്ദേഹത്തെ അറസ്​റ്റ്​ ചെയ്തത്​. പാലം നിർമാണക്കരാർ ആർ.ഡി.എസ് കമ്പനിക്ക്​ നൽകിയതിലും 8.25 കോടി രൂപ ചട്ടവിരുദ്ധമായി മൊബിലൈസേഷൻ അഡ്വാൻസായി അനുവദിച്ചതിലും അഴിമതിയുണ്ടെന്നാണ്​ കേസ്​. കരാർ കമ്പനിക്ക് അനധികൃത ലാഭമുണ്ടാക്കിയ വകയിൽ വൻ തുക കോഴ വാങ്ങിയെന്നാണ്​ ആരോപണം. തനിക്കെതിരായ ആരോപണങ്ങളും കേസും ഉണ്ടായിട്ട്​ മാസങ്ങളായെങ്കിലും തെരഞ്ഞെടുപ്പ്​ മുന്നിൽകണ്ട്​ രാഷ്​ട്രീയപ്രേരിതമായാണ്​ അറസ്​റ്റ്​ ​െചയ്​തതെന്നായിരുന്നു ഹരജിക്കാര​െൻറ വാദം. പാലം നിർമാണം നേരത്തെ പൂർത്തിയാക്കണമെന്ന സർക്കാർ തീരുമാനത്തതുടർന്നാണ് മൊബിലൈസേഷൻ അഡ്വാൻസ് നൽകിയതെന്നും ഇബ്രാഹീംകുഞ്ഞ്​ വാദിച്ചു.

അറസ്​റ്റിന് ഒരുദിവസം മുമ്പ് സ്വന്തം ഇഷ്​ടപ്രകാരം ആശുപത്രിയിൽ അഡ്മിറ്റായി ചികിത്സ തേടിയ ഒരാൾക്ക് ആരോഗ്യപരമായ കാരണങ്ങളുടെ പേരിൽ ജാമ്യം അനുവദിക്കാനാവി​ല്ലെന്ന്​ സിംഗിൾ ബെഞ്ച്​ വ്യക്തമാക്കി. ഹരജിക്കാരന്​ ആശുപത്രിയിലെ ചികിത്സ അനിവാര്യമാണെന്ന് മെഡിക്കൽ ബോർഡ്​ റിപ്പോർട്ടിൽനിന്ന്​ വ്യക്തമാണ്​. ആരോഗ്യനില മെച്ചപ്പെടുന്നതുവരെ ആശുപത്രിയിൽ തുടരേണ്ടതും​ അനിവാര്യമാണ്​. പ്രതിക്ക് പലതരത്തിലുള്ള രോഗബാധക്കും സാധ്യതയുണ്ട്​.

ഈ സാഹചര്യത്തിൽ കോവിഡ്കാലത്ത് ജാമ്യംനൽകി വീട്ടിലേക്ക് പോകണമെന്ന് പറയേണ്ട ആവശ്യമെന്താണെന്ന്​ കോടതി ആരാഞ്ഞു. ഹരജിക്കാര​െനതിരായ ആരോപണം അതി ഗൗരവത്തിലുള്ളതാണ്​. ഇതിൽ അന്വേഷണം നടന്നുവരുകയാണ്​. ഇൗ സാഹചര്യത്തിൽ ജാമ്യം അനുവദിക്കാനാകില്ലെന്ന്​ വ്യക്തമാക്കിയ കോടതി, ഹരജി തള്ളുകയായിരുന്നു​.