എടത്തലയിലെ പൊലീസ്​ മർദനം: ഉസ്​മാന്​ ഉപാധികളോടെ ജാമ്യം

കൊച്ചി: എടത്തലയിൽ പൊലീസ്​ മർദനത്തിനിരയായ കുഞ്ചാട്ടുകര മരത്തുംകുടി ഉസ്​മാന്​ ജാമ്യം. പൊലീസി​െന ഉസ്​മാൻ മർദിച്ചെന്ന്​ ആരോപിച്ച്​ രജിസ്​റ്റർ ചെയ്​ത കേസിൽ എറണാകുളം പ്രിൻസിപ്പൽ സെഷൻസ്​ ജഡ്​ജി ഡോ. കൗസർ എടപ്പഗത്ത്​ ഉപാധികളോടെ ജാമ്യം അനുവദിച്ചത്​. 50,000 രൂപക്കും തുല്യ തുകക്കുള്ള രണ്ടാൾ ഉറപ്പിന്മേലുമാണ്​ ജാമ്യം. 

കേസിൽ അന്തിമ റിപ്പോർട്ട്​ നൽകുംവരെ എല്ലാ ശനിയാഴ്​ചയും രാവിലെ ഒമ്പതിനും 10നും ഇടയിലും അന്വേഷണ ഉദ്യോഗസ്​ഥൻ ആവശ്യപ്പെടു​േമ്പാഴും ഹാജരാവുക, കോടതിയു​െട മുൻകൂർ അനുമതിയില്ലാതെ എറണാകുളം ജില്ല വിട്ടുപോകരുത്​, ജാമ്യ കാലയളവിൽ മറ്റ്​ കുറ്റകൃത്യങ്ങളിൽ ഏർപ്പെടരുത്​, സാക്ഷികളെ സ്വാധീനിക്കാനോ ഭീഷണിപ്പെടുത്താനോ ശ്രമിക്കരുത്​ തുടങ്ങിയവയാണ്​ ഉപാധികൾ. 

ഉസ്​മാൻ നിരപരാധിയാണെന്നും തെറ്റായാണ്​ കേസിൽ ചേർത്തതെന്നുമാണ്​ പ്രതിഭാഗം അഭിഭാഷക​ൻ വാദിച്ചത്​. ഇൗ വാദത്തെ പ്രോസിക്യൂഷൻ എതിർത്തു. എന്നാൽ, ഹരജിക്കാരൻ ഇൗമാസം എട്ടിനാണ്​ അറസ്​റ്റിലായത്​. അന്നുമുതൽ ജുഡീഷ്യൽ കസ്​റ്റഡിയിൽ കഴിയുകയാണ്​. അന്വേഷണം ഏറക്കുറെ പൂർത്തിയായിട്ടുണ്ട്​. ഇൗ സാഹചര്യത്തിൽ ഇനിയും കസ്​റ്റഡിയിൽ സൂക്ഷിക്കേണ്ട ആവശ്യമില്ലെന്ന്​ നിരീക്ഷിച്ചാണ്​ കോടതിയുടെ നടപടി. 

പൊലീസുകാർ സഞ്ചരിച്ച കാർ ബൈക്കിലിടിച്ചതിനെത്തുടർന്നുണ്ടായ തർക്കത്തിനിടെയാണ്​ ഉസ്​മാന്​ മർദനമേറ്റത്​. ഇതിനുശേഷം ആശുപത്രിയിൽ ചികിത്സയിലായ ഉസ്​മാനെ ജുഡീഷ്യൽ കസ്​റ്റഡിയിൽ റിമാൻഡ്​ ചെയ്യുകയായിരുന്നു. ഉസ്​മാനെ ജയിലിലേക്ക്​ മാറ്റാനുള്ള നീക്കം നടക്കുന്നതിനിടെ​ ആദ്യം ആലുവ ജുഡീഷ്യൽ ഫസ്​റ്റ്​ ക്ലാസ്​ മജിസ്​ട്രേറ്റ്​ കോടതിയെ ജാമ്യത്തിന്​ സമീപിച്ചിരുന്നു. എന്നാൽ, ഇൗ അപേക്ഷ തള്ളിയതിനെത്തുടർന്നാണ്​ സെഷൻസ്​ കോടതിയെ സമീപിച്ചത്​.