ആലപ്പുഴ തീരത്ത് അജ്ഞാത മൃതദേഹം; തീപിടിച്ച കപ്പലിൽ നിന്ന് കാണാതായ ആളുടേതെന്ന് സംശയം

അർത്തുങ്കൽ: ആലപ്പുഴ തീരത്ത് അജ്ഞാത മൃതദേഹം കണ്ടെത്തി. അർത്തുങ്കൽ ഹാർബറിന് സമീപം പുരുഷന്‍റെ മൃതദേഹമാണ് തീരത്തടിഞ്ഞത്. മൃതദേഹം തീപിടിച്ച സിം​ഗ​പ്പൂ​ർ ക​പ്പലിലെ കാണാതായ ജീവനക്കാരന്‍റേതാണോ എന്ന് സംശയം.

തീരത്തുണ്ടായിരുന്ന മത്സ്യത്തൊഴിലാളികളാണ് മൃതദേഹം ആദ്യം കണ്ടത്. അഴുകിയ നിലയിലായ മൃതദേഹം തിരിച്ചറിയാൻ ഡി.എൻ.എ പരിശോധന നടത്തേണ്ടതുണ്ട്. മൃതദേഹം ആശുപത്രിയിലേക്ക് മാറ്റാനുള്ള നടപടികൾ പുരോഗമിക്കുകയാണ്. കോസ്റ്റൽ പൊലീസിനെ വിവരം അറിയിച്ചിട്ടുണ്ട്.

ജൂൺ ഒമ്പതിന് കൊളംബോയിൽ നിന്ന് നവി മുംബൈയിലേക്ക് പോയ സിംഗപ്പൂർ കപ്പൽ വാ​ൻ​ഹാ​യ് 503ലാണ് വൻ സ്ഫോടനത്തോടെ തീപിടിച്ചത്. അഴീക്കലിനും ബേപ്പൂരിനുമിടയിൽ അന്തർദേശീയ കപ്പൽ പാതയിലാണ് അപകടം. കപ്പലിൽ 620 കണ്ടെയ്നറുകളാണ് ഉണ്ടായിരുന്നത്.

ചൈന മ്യാന്മാര്‍, ഇന്തോനേഷ്യ, തായ്ലാൻഡ് പൗരന്മാരായ 22 തൊഴിലാളികളാണ് കപ്പലിൽ ഉണ്ടായിരുന്നത്. ഇതിൽ കടലിൽ ചാടി രക്ഷപ്പെട്ട 18 ജീ​വ​ന​ക്കാ​രെ ഇന്ത്യൻ നാവികസേന കരക്കെത്തിച്ചു. എന്നാൽ, നാ​ലു​പേ​ർ ക​ട​ലി​ൽ മു​ങ്ങി​പ്പോ​യി​രു​ന്നു. യു ​ബോ-​ഫോ​ങ്, സാ​ൻ വി​ൻ, സെ​യ്ന​ൽ അ​ബി​ദി​ൻ, ഹ്സി ​ചി​യ-​വെ​ൻ എ​ന്നി​വ​രെ​യാ​ണ് കാ​ണാ​താ​യ​ത്. ഇവർക്കായുള്ള തിരച്ചിൽ പുരോഗമിക്കുകയാണ്.

അതേസമയം, ക​ഴി​ഞ്ഞ ദി​വ​സം ക​ണ്ണൂ​ർ തീ​ര​ത്ത്​ തീ​പി​ടി​ച്ച സിം​ഗ​പ്പൂ​ർ ചരക്കുക​പ്പ​ൽ വാ​ൻ​ഹാ​യി​യി​ലെ ലൈ​ഫ് ബോ​ട്ടും ഗ്യാ​സ് ടാ​ങ്കും അ​മ്പ​ല​പ്പു​ഴ തീ​ര​ത്ത് ര​ണ്ടി​ട​ങ്ങ​ളി​ൽ അ​ടി​ഞ്ഞു. ലൈ​ഫ് ബോ​ട്ട് അ​ടി​ഞ്ഞ്​ മ​ണി​ക്കൂ​റു​ക​ള്‍ക്ക​ക​മാ​ണ്​ ടാ​ങ്ക് അ​ടി​ഞ്ഞ​ത്.

പു​ന്ന​പ്ര അ​റ​പ്പ​പ്പൊ​ഴി ക​ട​ൽ​തീ​ര​ത്ത് ഞാ​യ​റാ​ഴ്ച രാ​ത്രി​യോ​ടെ​യാ​ണ് ലൈ​ഫ് ബോ​ട്ട് തീ​ര​ത്ത​ടി​ഞ്ഞ​ത്. തി​ങ്ക​ളാ​ഴ്ച പു​ല​ര്‍ച്ച പ​ത്ത് കിലോ മീറ്റർ തെ​ക്ക് വ​ള​ഞ്ഞ​വ​ഴി തീ​ര​ത്ത് വെ​ള്ള നി​റ​ത്തി​ലു​ള്ള ഗ്യാ​സ് ടാ​ങ്കും അ​ടി​ഞ്ഞു. തീരത്തടിഞ്ഞ ലൈ​ഫ് ബോ​ട്ടും ഗ്യാ​സ് ടാ​ങ്കും കൊല്ലം പോർട്ടിലേക്ക് മാറ്റും.