എൽ.ഡി.എഫ് സർക്കാറിന്‍റെ കോട്ടങ്ങൾ പറയാൻ യു.ഡി.എഫ് ഇറങ്ങും -പി.കെ. കുഞ്ഞാലിക്കുട്ടി

മലപ്പുറം: എൽ.ഡി.എഫ് സർക്കാർ നേട്ടങ്ങൾ പറഞ്ഞു താഴെ തട്ടിലേക്കിറങ്ങുന്നതിന് പിന്നാലെ കോട്ടങ്ങൾ പറയാൻ യു.ഡി.എഫ് ഇറങ്ങുമെന്ന് മുസ് ലിം ലീഗ് നേതാവ് പി.കെ. കുഞ്ഞാലിക്കുട്ടി. യു.ഡി.എഫിന്റെ ജനകീയ വിചാരണ സദസ്സുകളിൽ മുൻനിര നേതാക്കൾ തന്നെ പ​ങ്കെടുക്കും. സാധാരണക്കാരുടെ ജീവിതം ഇത്രയധികം ദുഷ്കരമായ കാലമില്ലെന്നും കുഞ്ഞാലിക്കുട്ടി ചൂണ്ടിക്കാട്ടി.

ക്ഷേമ പെൻഷനുകൾ ഉൾപടെ മുടങ്ങി ജനജീവിതം ദുഷ്കരമാക്കിയ സംസ്ഥാന സർക്കാറിനെതിരെ വലിയ രീതിയിൽ കാമ്പയിൻ നടത്തും. സാമ്പത്തിക പ്രതിസന്ധി വികസന​ പ്രവർത്തനങ്ങൾ മരവിക്കാൻ കാരണമായിട്ടുണ്ട്. ജി.എസ്.ടി സംവിധാനം ഫലപ്രദമായി ഉപയോഗപ്പെടുത്തുന്നതിൽ സർക്കാർ വലിയ പരാജയമാണ്. ഈ സർക്കാർ നേട്ടമാണോ കോട്ടമാണോ കൊണ്ടുവന്നതെന്ന് ജനങ്ങൾക്കറിയാം.

സിൽവർ ലൈൻ പദ്ധതി ജനങ്ങൾക്ക് വേണ്ടാത്തതാണെന്ന് തെളിഞ്ഞതാണ്. കേന്ദ്രത്തിനും സംസ്ഥാനത്തിനും അത് ബോധ്യപ്പെട്ടതാണ് എന്നാണ് മനസിലാവുന്നത് -കുഞ്ഞാലിക്കുട്ടി പറഞ്ഞു.

വിലക്കയറ്റം കൊണ്ട് ജനം പൊറുതി മുട്ടുന്നതിനിടയിൽ അമിതമായി വൈദ്യുതിചാർജ് കൂടി വർധിപ്പിച്ച സംസ്ഥാന സർക്കാർ നടപടിക്കെതിരെ വ്യാ​ഴാഴ്ച സംസ്ഥാന വ്യാപകമായി കെ.എസ്.ഇ.ബി ഓഫിസുകൾക്ക് മുന്നിൽ മുസ്‍ലിം ലീഗ് ധർണ നടത്തും.