നടക്കാവ്​ ​ക്ഷേത്രത്തിൽ വെടിക്കെട്ടപകടം; 16 പേർക്ക്​ പരിക്ക്​

ഉദയംപേരൂർ: നടക്കാവ്​ ​ക്ഷേത്രത്തിലെ ഉത്സവത്തിനിടെ നടന്ന വെടിക്കെട്ടിൽ പടക്കം ആൾക്കൂട്ടത്തിലേക്ക്​ തെറിച്ച ുവീണ് പൊട്ടി 16ഓളം പേർക്ക് പരിക്കേറ്റു. സാരമായി പരിക്കേറ്റ എട്ടുപേരെ കളമശ്ശേരി മെഡിക്കൽ കോളജ്​ ആശുപത്രിയിലും മറ്റുള്ളവരെ തൃപ്പൂണിത്തുറ താലൂക്ക് ആശുപത്രിയിലും പ്രവേശിപ്പിച്ചു. ഗുരുതര പരിക്കേവരിൽ 60 വയസ്സുകാരിയും ഉണ്ട്​. ഇവരെ രാത്രിയോടെ എറണാകുളം സ്​പെഷലിസ്​റ്റ്​ ആശുപത്രിയിലേക്ക്​ മാറ്റി. മറ്റുള്ളവരുടെ പരിക്ക്​ ഗുരുതരമല്ലെന്ന്​ ആശുപതി അധികൃതർ അറിയിച്ചു.

ബുധനാഴ്​ച രാത്രി ഒമ്പതോടെ ക്ഷേത്രത്തിലെ പൂരൂരുട്ടാതി താലപ്പൊലി നടക്കുന്നതിനിടെയാണ് അപകടം. ദിശ തെറ്റിയ പടക്കം ആൾക്കൂട്ടത്തിലേക്ക്​ വീണ്​ പൊട്ടുകയായിരുന്നു. ഇതോടെ തിങ്ങിക്കൂടിയിരുന്നവർ നാലുപാടും ചിതറിയോടി. മിക്കവരുടെയും കാലുകൾക്കാണ്​ പരിക്ക്​. സംഭവസ്ഥലത്തുണ്ടായിരുന്ന പൊലീസും നാട്ടുകാരും വിവരമറിഞ്ഞെത്തിയ അഗ്​നിരക്ഷാസേനയും പരിക്കേറ്റവരെ ഉടൻ തൃപ്പൂണിത്തുറ താലൂക്ക്​ ആശുപത്രിയിൽ എത്തിച്ചു. അവിടെനിന്നാണ്​​ സാരമായി പരിക്കേറ്റ എട്ടുപേരെ കളമശ്ശേരി മെഡിക്കൽ കോളജ്​ ആശ​​ുപത്രിയിലേക്ക്​ മാറ്റിയത്​.