തോട്ടിൽ കാൽവഴുതി വീണ്​ ഒഴുകിയ രണ്ടു വയസ്സുകാരിക്ക്​ ഇത്​ രണ്ടാംജന്മം

പാലാ: രണ്ടുവയസ്സുകാരി കൊച്ചുതെരേസക്ക്​ ഇത്​ രണ്ടാംജന്മം. അമ്മവീടിനടുത്ത്​ പൊന്നൊഴുകും തോടിന്​ സമീപത്തെ കൈത്തോട്ടിൽ കാൽവഴുതി വീണ തെരേസയെ ജീവിതത്തിലേക്ക്​ കൈപിടിച്ചുകയറ്റിയത് കുളിക്കാനിറങ്ങിയ കുട്ടികൾ.

തിങ്കളാഴ്​ച വൈകീട്ട്​ ആറോടെയാണ് സംഭവം. പാലാ ചാവറ സ്കൂൾ അധ്യാപകനായ കുറുപ്പന്തറ മറ്റത്തിൽ ജോമിയുടെ മകളായ തെരേസ അമ്മവീടായ മല്ലികശ്ശേരിയിലെ പുത്തൻപുരയ്ക്കൽ വീട്ടിൽ അമ്മ ബിന്ദുവിനോടൊപ്പമായിരുന്നു. വൈകീട്ട്​ വീടിന്​ സമീപ​െത്ത കൈത്തോട്ടിൽ വീണത് ആരും കണ്ടില്ല.

200 മീറ്ററോളം ഒഴുകി പൊന്നൊഴുകും തോട്ടിലേക്ക്​ ചേരുന്ന ഭാഗത്ത് എത്തി.

തോട്ടിൽ കുളിക്കുകയായിരുന്ന കാരിമറ്റത്തിൽ സീനയും കൂട്ടുങ്കൽ പ്രിൻസിയും കുട്ടി ഒഴുകി വരുന്നതുകണ്ടു. ഇവർക്ക്​ പിടിക്കാൻ കഴിഞ്ഞില്ല. അലമുറയിട്ടതോടെ സമീപത്തുണ്ടായിരുന്ന കല്ലമ്പള്ളിൽ ആനന്ദും കൂട്ടുകാരും ചേർന്ന്​ കരക്കു​കയറ്റി. അബോധാവസ്ഥയിലായിരുന്ന തെരേസയെ ഉടൻ പുതിയിടം ആശുപത്രിയിലെത്തിച്ചു.

പ്രഥമശുശ്രൂഷ നൽകി പാലാക്ക്​ കൊണ്ടുപോകാൻ നിർദേശിച്ചതിനെത്തുടർന്ന്​ ആംബുലൻസ് വിളിക്കാൻ ശ്രമിക്കുന്നതിനിടെ അവിടെയുണ്ടായിരുന്ന മാണി സി. കാപ്പൻ എം.എൽ.എ ത​​​െൻറ വണ്ടിയിൽ പാലാ മരിയൻ മെഡിക്കൽ സ​​െൻററിൽ എത്തിക്കുകയായിരുന്നു. കുട്ടി അപകടനില തരണം ചെയ്തതായി ആശുപത്രി അഡ്മിനിസ്ട്രേറ്റർ സിസ്​റ്റർ ഷേർളി, സിസ്​റ്റർ ബെൻസി എന്നിവർ അറിയിച്ചു.