കാർ ബജിക്കടയിലേക്ക്​ ഇടിച്ചുകയറി രണ്ടുപേർക്ക് പരിക്ക്

മാന്നാർ: മരണവീട്ടിലേക്ക് ബംഗളൂരുവിൽനിന്ന്​ വരുകയായിരുന്ന പുലിയൂർ സ്വദേശികളായ കുടുംബം സഞ്ചരിച്ച കാർ ബജിക്കടയിലേക്ക്​ ഇടിച്ചുകയറി രണ്ടുപേർക്ക് പരിക്ക്. ചായ കുടിക്കാനെത്തിയ ചൂരലെന്ന വിളിപ്പേരുള്ള രാജപ്പൻ ( 60), വിഷവർശ്ശേരിക്കര കുന്നുംപുറത്ത് വീട്ടിൽ കൊച്ചുമോൻ (50)എന്നിവർക്കാണ് പരിക്കേറ്റത്.

ഞായറാഴ്ച പുലർച്ച മൂന്നിന്​ തിരുവല്ല-കായംകുളം സംസ്ഥാന പാതയിൽ മാന്നാർകുറ്റിയിൽമുക്ക് പെട്രോൾ പമ്പിന് എതിർ വശമുള്ള കുരട്ടിശ്ശേരി നാഥൻ പറമ്പിൽ സിയാദിന്റെ ഉടമസ്ഥതയിലുള്ള അൽനൂർ തട്ടുകടയിലേക്കാണ്​ വാഹനം ഇടിച്ചുകയറിയത്​.

സൈക്കിളും കടയുടെ നെയിം ബോർഡും ചില്ലലമാരയും തകർന്നു. അഞ്ചു​ മാസംമുമ്പും മറ്റൊരു ദിശയിൽ സഞ്ചരിച്ച കാർ ഇവിടേക്ക്​ ഇടച്ചുകയറിയിരുന്നു. കഴിഞ്ഞദിവസം മരിച്ച ഇരമത്തൂർ ജ്യോതിഭവനത്തിൽ ജ്യോതിലക്ഷ്​മിയുടെ സംസ്കാരത്തിൽ പങ്കെടുക്കാൻ പുലിയൂർ സ്വദേശികളായ കുടുംബങ്ങൾ രണ്ടു കാറിലായി വരുമ്പോഴാണ് ഒരു കാർ നിയന്ത്രണം വിട്ടത്.