രണ്ട്​ അന്തർ സംസ്ഥാന തൊഴിലാളികളെ കഴുത്തറുത്തു​ കൊന്നു; ഒരാൾ പിടിയിൽ

കട്ടപ്പന: ഇരട്ടയാറ്റിൽ അന്തർ സംസ്‌ഥാന തൊഴിലാളികൾ തമ്മിലുണ്ടായ തർക്കത്തെ തുടർന്ന്​ രണ്ടു പേരെ കഴുത്തറുത്തു കൊന്നു. ഝാർഖണ്ഡ് ഗോഡ ജില്ലയിലെ ലാറ്റ സ്വദേശികളായ ജംഷ് മറാണ്ടി(32), ഷുക്ക് ലാൽ മറാണ്ടി (43) എന്നിവരാണ് കൊല്ലപ്പെട്ടത്. ഷുക്ക് ലാലിൻെറ ഭാര്യ വാസന്തി തലയിൽ വെട്ടേറ്റതിനെ തുടർന്ന്​ ആശുപത്രിയിൽ ചികിത്സയിലാണ്.

സംഭവത്തിൽ കൂടെ താമസിച്ചിരുന്ന മറ്റൊരു അന്തർ സംസ്ഥാന തൊഴിലാളിയായ ഝാർഖണ്ഡ് ഗോഡ ജില്ലയിലെ പറയ് യാഹൽ സ്വദേശി സഞ്ജയ് ബാസ്കി (30) പൊലീസ്​ പിടിയിലായിട്ടുണ്ട്. പ്രതിയെ പിടികൂടുന്നതിനിടെ കട്ടപ്പന ഡി വൈ.എസ്.പി എൻ.സി രാജ്‌മോഹൻ ഉൾപ്പെടെ രണ്ട് പൊലീസുകാർക്കും പരിക്കേറ്റു.

കട്ടപ്പനക്കടുത്തു വലിയതോവാളയിൽ ഞായറാഴ്​ച രാത്രി 11 മണിയോടെയായിരുന്നു സംഭവം. തൊഴിലാളികൾ തമ്മിലുണ്ടായ സാമ്പത്തിക ഇടപാട്​ സംബന്ധിച്ച തർക്കമാണ്​ കൊലപാതകത്തിൽ കലാശിച്ചത്​. പണത്തെക്കുറിച്ച് ഉണ്ടായ തർക്കം സംഘട്ടനത്തിലെത്തുകയും തുടർന്ന്​ ബാസ്​കി രണ്ട് പേരെയും കഴുത്തറുത്തു കൊല്ലുകയുമായിരുന്നു. സംഘർഷം തടയാൻ ശ്രമിക്കുന്നതിനിടെയാണ് യുവതിയുടെ തലയിൽ വെട്ടേറ്റത്​.

സംഭവത്തിന് ശേഷം ഏലക്കാട്ടിൽ ഒളിച്ച പ്രതിയെ പൊലീസ് ബലമായി കീഴ്‌പ്പെടുത്തുകയായിരുന്നു.