തിരുവനന്തപുരത്ത്​ കർശന നിയന്ത്രണം; പുറത്തിറങ്ങരുതെന്ന്​ കലക്​ടർ

തിരുവനന്തപുരം: കോവിഡ്​ 19 വൈറസ്​ ബാധയുടെ പശ്​ചാത്തലത്തിൽ തിരുവനന്തപുരത്ത്​ കർശന നിയന്ത്രണം ഏർപ്പെടുത്തുന്ന ു. തലസ്ഥാനത്തെ ഷോപ്പിങ്​ മാളുകൾ അടച്ചിടുമെന്നും ബീച്ചുകളിൽ സന്ദർശകരെ വിലക്കുമെന്നും ജില്ലാ കലക്​ടർ അറിയിച്ചു. ബ്യൂട്ടിപാർലറുകൾക്കും ജിമ്മുകൾക്കും കർശന നിയന്ത്രണമേർപ്പെടുത്തും.

രോഗലക്ഷണമുള്ളവർ പൊതുഗതാഗത സംവിധാനം ഉപയോഗിക്കരുത്​. ജനങ്ങൾ അത്യാവശ്യ കാര്യങ്ങൾക്ക്​ മാത്രമേ പുറത്തിറങ്ങാവു. ഉത്സവങ്ങളും മറ്റ്​ ആഘോഷ പരിപാടികളും നിർത്തിവെക്കാൻ നോട്ടീസ്​ നൽകും. വർക്കലയിൽ ജാഗ്രത കൂട്ടണമെന്നും ജില്ലാ കലക്​ടർ നിർദേശിച്ചു.

തിരുവനന്തപുരത്തെ രോഗി വീട്ടിലെ നിരീക്ഷണം പാലിച്ചില്ല. ഓ​ട്ടോറിക്ഷയിലാണ്​ ആശുപത്രിയിലെത്തിയത്​. ഇയാളുമായി അടുത്തിടപഴകിയ ആളുകളുടെ വിവരങ്ങൾ ലഭ്യമായിട്ടില്ല. രോഗബാധിതൻ ഉത്സവത്തിന്​ പോയത്​ അന്വേഷിക്കും. തിരുവനന്തപുരം ജില്ലയിൽ 249 പേരാണ്​ നിരീക്ഷണത്തിലുള്ളത്​. 231 പേർ വീട്ടിലും 18പേർ ആശുപത്രിയിലുമാണ്​ നിരീക്ഷണത്തിലുള്ളത്​. 70 സാമ്പിളുകളുടെ പരിശോധന ഫലം ജില്ലയിൽ ലഭിക്കാനുണ്ടെന്നും അദ്ദേഹം പറഞ്ഞു.