ചെറുതുരുത്തിയിൽ ഓടിക്കൊണ്ടിരുന്ന ട്രെയിനിന് മുകളിലേക്ക് മരം വീണു; ആർക്കും പരിക്കില്ല

ചെറുതുരുത്തി: തൃശൂർ ചെറുതുരുത്തിയിൽ ഓടിക്കൊണ്ടിരുന്ന ട്രെയിനിന് മുകളിലേക്ക് മരച്ചില്ല പൊട്ടി വീണു. തിരുനെൽവേലി - ജാംനഗർ എക്സ്പ്രസിന് മുകളിലേക്കാണ് മരച്ചില്ല വീണത്. ആർക്കും പരിക്കില്ല. രാവിലെ 10 മണിയോടെയാണ് സംഭവം. ഇതേത്തുടർന്ന് ഒരു മണിക്കൂറോളം ട്രാക്കിലൂടെയുള്ള ട്രെയിൻ ഗതാഗതം തടസപ്പെട്ടു.

ചെറുതുരുത്തി കലാമണ്ഡലത്തിനു സമീപം റെയിൽവേ പാലത്തിന് താഴെയാണ് അപകടമുണ്ടായത്. ലോക്കോ പൈലറ്റിന്റെ ഇടപെടലാണ് വലിയ അപകടം ഒഴിവാക്കിയത്. മരം വീഴുന്നത് കണ്ട ലോക്കോ പൈലറ്റ് ട്രെയിനിന്റെ വേഗം കുറക്കുകയായിരുന്നു.

മരം പൂർണ്ണമായി മുറിച്ചുമാറ്റിയ ശേഷമാണ് ഗതാഗതം പുന:രാരംഭിച്ചത്.