ഇന്ന്​ മുതൽ ട്രെയിനുകൾക്ക്​ നിയന്ത്രണം

തൃശൂർ: തൃശൂരിനും മുളങ്കുന്നത്തുകാവിനുമിടക്ക്​ ട്രാക്കിൽ അറ്റകുറ്റപ്പണി നടക്കുന്നതിനാൽ വെള്ളിയാഴ്​ച മുതൽ ഈ മാസം 16 വരെ ട്രെയിനുകൾക്ക്​ ആഴ്​ചയിൽ അഞ്ച്​ ദിവസം നിയന്ത്രണം ഏർപ്പെടുത്തും. ചൊവ്വ, ബുധൻ ദിവസങ്ങളിൽ ഒഴികെയാണ്​ നിയന്ത്രണം. കോയമ്പത്തൂർ-തൃശൂർ പാസഞ്ചർ വെള്ളിയാഴ്​ച മുതൽ നാല്​ വരെയും ഏഴ്​ മുതൽ 11 വരെയും 14, 15 തീയതികളിലും ഷൊർണൂരിനും തൃശൂരിനുമിടയിൽ റദ്ദാക്കുമെന്ന്​ റെയിൽവേ അറിയിച്ചു.

തൃശൂർ-കണ്ണൂർ പാസഞ്ചർ രണ്ട്​ മുതൽ അഞ്ച്​ വരെയും എട്ട്​ മുതൽ 12 വരെയും 15, 16 തീയതികളിലും തൃശൂരിനും ഷൊർണൂരിനുമിടക്ക്​ റദ്ദാക്കും. കണ്ണൂർ-എറണാകുളം ഇൻറർസിറ്റി എക്​സ്​പ്രസ്​ ഒന്ന്​ മുതൽ നാല്​ വരെയും ഏഴ്​ മുതൽ 11 വരെയും 14, 15 തീയതികളിലും മുളങ്കുന്നത്തുകാവ്​ വരെ മാത്രമേ സർവിസ്​ നടത്തുകയുള്ളൂ. രാത്രി പുറപ്പെടുന്ന ഗുരുവായൂർ-ചെന്നൈ എഗ്​മോർ എക്​സ്​പ്രസ്​ ഒന്ന്​ മുതൽ നാല്​ വരെയും ഏഴ്​ മുതൽ 11 വരെയും 14, 15 തീയതികളിലും 10.35ന്​ പകരം 10.50നാണ്​ പുറപ്പെടുക.

ഓഖ-എറണാകുളം എക്​സ്​പ്രസ്​ മൂന്നിനും 10നും ഗംഗാനഗർ-കൊച്ചുവേളി എക്​സ്​പ്രസ്​ ഏഴിനും 14നും ഗാന്ധിധാം-നാഗർകോവിൽ എക്​സ്​പ്രസ്​ രണ്ടിനും ഒമ്പതിനും വരാവൽ-തിരുവനന്തപുരം എക്​സ്​പ്രസ്​ ഒന്നിനും എട്ടിനും മുളങ്കുന്നത്തുകാവിലോ വടക്കാഞ്ചേരിയിലോ ഒന്നര മണിക്കൂറോളം നിർത്തിയിടും.

ഹൈദരാബാദ്​-കൊച്ചുവേളി സ്​പെഷൽ ഫെയർ ട്രെയിൻ മൂന്നിനും പത്തിനും 35 മിനിറ്റും നിസാമുദ്ദീൻ-തിരുവനന്തപുരം എക്​സ്​പ്രസ്​ ഇതേ ദിവസങ്ങളിൽ 80 മിനിറ്റും വടക്കാഞ്ചേരിയിൽ പിടിച്ചിടും. പട്​ന-എറണാകുളം എക്​സ്​പ്രസ്​ ഏഴ്​, 14 തീയതികളിൽ വടക്കാഞ്ചേരിയിൽ 80 മിനിറ്റ്​ നിർത്തിയിടും. ഇതേ ദിവസങ്ങളിൽ മംഗളൂരു-തിരുവനന്തപുരം എക്​സ്​പ്രസ്​, മധുര-തിരുവനന്തപുരം അമൃത എക്​സ്​പ്രസ്​ എന്നിവ വള്ള​ത്തോൾനഗറിൽ മുക്കാൽ മണിക്കൂർ പിടിച്ചിടുമെന്നും റെയിൽവേ അറിയിച്ചു.