റെയിൽവേ ഗേറ്റ്​ തുറന്നുകിടക്കവെ എൻജിൻ കുതിച്ചെത്തി; ബസ്​ ഇടിയിൽനിന്നൊഴിവായത്​ തലനാരിഴക്ക്

എടക്കാട്: റെയിൽവേ ഗേറ്റ്​ തുറന്നുകിടക്കവെ മുന്നറിയിപ്പുകളില്ലാതെ എൻജിൻ കുതിച്ചെത്തി. നിറയെ യാത്രക്കാരുമായി സ്വകാര്യ ബസ്​ പാളം കടന്നതിനു തൊട്ടുപിറകെയാണ്​ എൻജിൻ വന്നത്​. അപകടസമാനമായ നിമിഷങ്ങൾ കണ്ട പ്രദേശവാസികൾ പരിഭ്രാന്തരായി.
ചൊവ്വാഴ്​ച രാവിലെ 11.30ഒാടെ കണ്ണൂർ-തലശ്ശേരി ദേശീയപാതയിലെ നടാൽ റെയിൽവേ ഗേറ്റിലാണ്​ സംഭവം. കണ്ണൂർ ഭാഗത്തുനിന്ന്​ അതിവേഗതയിലെത്തിയ ട്രെയിനി​​​െൻറ എൻജിൻ ഗേറ്റ്​ തുറന്നുകിടക്കെ തന്നെ കടന്നുപോവുകയായിരുന്നു.

ഇതേസമയം തലശ്ശേരിയിൽനിന്ന്​ കണ്ണൂരിലേക്ക് പോകുന്ന സ്വകാര്യ ബസ്​ ഗേറ്റിലെ രണ്ടാമത്തെ പാളം കടന്നതേയുണ്ടായിരുന്നുള്ളൂ. തലനാരിഴ വ്യത്യാസത്തിനാണ് ദുരന്തം ഒഴിവായത്.11.30 കഴിഞ്ഞ് കോയമ്പത്തൂരിൽനിന്ന്​ മംഗളൂരുവിലേക്ക് പോകുന്ന ഇൻറർസിറ്റി കടന്നുപോയ ഉടനെ ഗേറ്റ്​ തുറന്നിരുന്നു. ഗേറ്റിനിരുവശത്തുമുള്ള വാഹനങ്ങൾ കടന്നുപോവുകയും ചെയ്തു. ഇതിനുപിന്നാലെയാണ്​ എൻജിനെത്തിയത്​.

എൻജിൻ കടന്നുപോയ വിവരം നടാൽ റെയിൽവേ ഗേറ്റിൽ ജോലിചെയ്തുകൊണ്ടിരുന്ന ജീവനക്കാരൻ എടക്കാട് റെയിൽവേ സ്​റ്റേഷനിൽ കൈമാറി. ഇതേതുടർന്ന്​ എൻജിൻ എടക്കാട്​ സ്​​േറ്റഷനിൽ പിടിച്ചിടുകയായിരുന്നു. പിന്നീട് സംഭവം റിപ്പോർട്ട് ചെയ്തശേഷം മാത്രമാണ് എൻജിൻ എടക്കാടുനിന്ന്​ വിട്ടത്. സിഗ്​നൽ തെറ്റിച്ചാണ് കണ്ണൂരിൽനിന്ന്​ വന്ന എൻജിൻ കടന്നുപോയതെന്ന് എടക്കാട് റെയിൽവേ സ്​റ്റേഷൻ മാസ്​റ്റർ സുധാകരൻ പറഞ്ഞു. സംഭവം ലോക്കോപൈലറ്റ് കാട്ടിയ കൃത്യവിലോപമാണെന്നും ഇതേക്കുറിച്ച് സമഗ്രമായ ഉന്നതതല അന്വേഷണം നടക്കുമെന്നും അദ്ദേഹം പറഞ്ഞു.