ഗതാഗത നിയമം ലംഘിക്കാൻ വരട്ടെ, ഇനി, എല്ലാം ക്യാമറ വലയത്തിൽ

റോഡിലിറങ്ങിയാൽ സർവ നിയങ്ങളും കാറ്റിൽ പറത്തുന്ന ഡ്രൈവർമാർ കരുതിയിരുന്നോ, ഇനിയെല്ലാം ക്യാമറയിൽ പതിയും. പിന്നാലെ നിയമത്തിന്റെ പിടിവീഴും.

സംസ്ഥാനത്ത്​ ദേശീയ, സംസ്ഥാന പാതകളിലും പ്രധാനറോഡുകളിലും സ്ഥാപിച്ച ക്യാമറകളിൽ 90 ശതമാനവും ഏപ്രിൽ ഒന്നുമുതൽ പ്രവർത്തിച്ചുതുടങ്ങും. ഇതോടെ, അപകടങ്ങൾ വലിയ തോതിൽ കുറക്കാൻ കഴിയുമെന്നാണ് വിലയിരുത്തൽ.

235കോടി രൂപ ചെലവിൽ 726 ക്യാമറകളാണ്​ മോട്ടോർ വാഹനവകുപ്പിനു കെൽട്രോൺ കൈമാറിയിരിക്കുന്നത്. ഹെൽമെറ്റ്​, സീറ്റ്​ബെൽറ്റ്​ എന്നിവ ധരിക്കാതെ വാഹനമോടിക്കുക, വണ്ടിയോടിക്കുമ്പോൾ മൊബൈലിൽ സംസാരിക്കുക, ഇരുചക്രവാഹനങ്ങളിൽ മൂന്നുപേർ യാത്രചെയ്യുക, അപകടകരമായി ഓടിക്കൽ എന്നിവ പിടികൂടാനാണ്​ 700 നിർമ്മിത ബുദ്ധി ക്യാമറകൾ. മൂന്നിലെ രണ്ടുപേരും സീറ്റ്​ ബെൽറ്റ്​ ധരിച്ചില്ലെങ്കിലും ക്യാമറ പിടിക്കും. ഇതെപോലെ ഹെൽമെറ്റും.

അമിതവേഗം പിടികൂടാനായി രണ്ടെണ്ണം തിരുവനന്തപുരം ബൈപ്പാസിൽ ചാക്കയിലും ഇൻഫോസിസിന്‍റെ മുന്നിലും രണ്ടെണ്ണം കൊല്ലം ബൈപ്പാസിലും സിഗ്​നലുകൾ തെറ്റിക്കുന്നവർക്കായി ജംങ്​ഷനുകളിൽ 18 ക്യാമറകളും തയ്യാറാണ്​. മോട്ടോർ വാഹനവകുപ്പപിന്‍റെ വാഹനത്തിൽ സ്വയം പ്രവർത്തിക്കുന്ന നാലുക്യാമറ സംവിധാനങ്ങളുണ്ടാവും. റോഡരികിൽ നിർത്തിയിട്ട വാഹനത്തിലെ ക്യാമറ അതിവേഗത്തിൽ പോകുന്ന വണ്ടിയുടെ ചിത്രങ്ങൾ സഹിതം വിവരങ്ങൾ കൺട്രോൾറൂമിലേക്ക്​ അയക്കും. നിലവിൽ മോട്ടോർ വാഹനവകുപ്പിനുള്ളള ക്യാമറകൾ പ്രവർത്തിപ്പിക്കാൻ ഒരാൾ വേണം.

വാഹനത്തിൽ ഘടിപ്പിക്കുന്ന ക്യാമറകൾ ഒഴികെയുള്ളവയെല്ലാം പ്രവർത്തിക്കുന്നത്​ സൗർജോർജത്തിലാണ്​. 4ജി കണക്ടിവിറ്റി സിമ്മിലാണ്​ കൈമാറ്റം. എല്ലാ വാഹനങ്ങളെലും ക്യാമറ ബോക്​സിലുള്ള വിഷ്വൽ പ്രൊസസിങ്​ യൂണിറ്റ്​ വിശകലനം ചെയ്യും. ചിത്രങ്ങളും പകർത്തും. ഗതാഗതനിയമം ലംഘിച്ച വണ്ടികളുടെ ചിത്രവും ആളിന്‍റെ ഫോട്ടോയും മോട്ടോർ വാഹനവകുപ്പിന്‍റെ കൺ​ട്രോൾറൂമിലേക്ക്​ അയക്കും. ആറുമാസത്തെ ദൃശ്യങ്ങൾ ശേഖരിക്കാൻ ഇതിൽ സംവിധാനമുണ്ട്​. ഓരോവർഷം കഴിയും തോറും റോഡപകടങ്ങൾ വർധിക്കുന്ന സാഹചര്യത്തിൽ പുതിയ ക്യാമറ സംവിധാനം ഏറെ ഗുണം ചെയ്യുമെന്നാണ് വിലയിരുത്തൽ.