കള്ള്​ വാങ്ങാൻ വൻതിരക്ക്​; പൊലീസ് ഷാപ്പ് പൂട്ടിച്ചു

തളിപ്പറമ്പ്: കള്ള് വാങ്ങാൻ വന്നവർ സാമൂഹിക അകലം പാലിക്കാതെ തിരക്കുകൂട്ടിയപ്പോൾ പൊലീസെത്തി ഷാപ്പ് പൂട്ടിച്ചു. കണ്ണൂർ ജില്ലയിലെ തളിപ്പറമ്പ് മന്നയിലാണ്​ സംഭവം. 

ഷാപ്പിനു മുന്നിൽ ചൊവ്വാഴ്​ച രാവിലെ നല്ല തിരക്കാണ്​ അനുഭവപ്പെട്ടത്​. കള്ളിന്​ വരിനിന്നവർ മുഖാവരണം ധരിച്ചിരുന്നെങ്കിലും സാമൂഹിക അകലം പാലിക്കാതെ കൂടി നിൽക്കുകയായിരുന്നു. 

സംഭവം കണ്ടവർ ഉടൻ പൊലീസിനെ വിവരമറിയിച്ചു. പൊലീസെത്തി ഷാപ്പ് അടപ്പിക്കുകയും തുടർ ദിവസങ്ങളിൽ ഇത് ആവർത്തിക്കരുതെന്ന് താക്കീത് നൽകുകയും ചെയ്തു.