ടൈറ്റാനിയം ജോലി തട്ടിപ്പ്: മുഖ്യപ്രതി ശശികുമാരൻ തമ്പി അറസ്റ്റിൽ

തിരുവനന്തപുരം: ടൈറ്റാനിയം ജോലി തട്ടിപ്പ് കേസിലെ മുഖ്യപ്രതി ​ടൈറ്റാനിയം ലീഗൽ ഡി.ജി.എം ശശികുമാരൻ തമ്പി അറസ്റ്റിൽ. ശനിയാഴ്ച രാവിലെ ഇയാൾ ക​ന്‍റോൺമെൻറ് സ്റ്റേഷനിൽ കീഴടങ്ങുകയായിരുന്നു. മുന്‍കൂര്‍ ജാമ്യഹരജികൾ ഹൈകോടതി ഉൾപ്പെടെ തള്ളിയതിനെ തുടർന്നായിരുന്നു​ കീഴടങ്ങൽ. ജോലി തട്ടിപ്പുമായി ബന്ധപ്പെട്ട് രജിസ്റ്റർ ചെയ്ത 15 കേസുകളിലും പ്രതിയായ ശശികുമാരൻതമ്പിയെ കോടതിയിൽ ഹാജരാക്കി റിമാൻഡ്​​ ചെയ്തു.

ടൈറ്റാനിയത്തിൽ ജോലി വാഗ്ദാനം ചെയ്ത് ഉദ്യോഗാർഥികളിൽനിന്നും ലക്ഷങ്ങൾ തട്ടിയെന്നാണ്​ കേസ്​. ശശികുമാരൻ തമ്പിയും സുഹൃത്ത്​ ശ്യാംലാലുമാണ്​ പ്രധാന പ്രതികൾ.​ ഇതുമായി ബന്ധപ്പെട്ട്​ രജിസ്റ്റർ ചെയ്ത എല്ലാ കേസുകളിലും ഇയാൾക്ക്​ ബന്ധമുണ്ടെന്നാണ്​ പൊലീസും പ്രോസിക്യൂഷനും ആരോപിക്കുന്നത്​.

ഇയാ​ളെ കസ്റ്റഡിയിൽ വാങ്ങി ചോദ്യം ചെയ്യുമെന്ന്​​ പൊലീസ്​ വ്യക്തമാക്കി. കേസിൽ സ്റ്റാൻലി ജോൺ എന്ന ഒരു പ്രതിക്ക്​ മാത്രമാണ്​ ഇതുവരെ കോടതി ജാമ്യം അനുവദിച്ചത്​.