'മറുപടി പറഞ്ഞു തളരുന്നു'; സഹോദരന്‍റെ ബി.ജെ.പി പ്രവേശനത്തിൽ പന്തളം സുധാകരൻ

കോഴിക്കോട്: സഹോദരൻ പന്തളം പ്രതാപന്‍റെ ബി.ജെ.പി പ്രവേശനത്തിൽ വേദനയും ദുഃഖവും ചൂണ്ടിക്കാട്ടി കോൺഗ്രസ് നേതാവ് പന്തളം സുധാകരന്‍റെ ഫേസ്ബുക്ക് പോസ്റ്റ്. വാർത്ത പുറത്തുവന്നതോടെ സഹ പ്രവർത്തകരോടും സുഹൃത്തുക്കളോടും മറുപടി പറഞ്ഞ് തളർന്നുവെന്ന് സുധാകരൻ വ്യക്തമാക്കി. എന്‍റെ ശക്തി കോൺഗ്രസാണ്. ഈ കുടുംബം ഉപേക്ഷിച്ചു പോകുന്ന ഒരാളെ തടയാൻ മുൻ അറിവുകളില്ലാഞ്ഞതിനാൽ കഴിഞ്ഞില്ലെന്ന ചിന്ത അലട്ടുന്നുണ്ട്. ഈ മനംമാറ്റത്തിനു വഴിവെച്ച സാഹചര്യമെന്നെങ്കിലും പൊതു സമൂഹത്തോടു പറയാനുള്ള ബാധ്യത പ്രതാപനുണ്ടെന്നും സുധാകരൻ കുറിച്ചു.

ഫേസ്ബുക്ക് പോസ്റ്റിന്‍റെ പൂർണരൂപം:

അതീവ ഹൃദയവേദനയോടെയാണ് ഇതെഴുതുന്നത്. ഇന്നു വൈകുന്നേരം ചാനലിൽകണ്ട വാർത്ത എനിക്ക് കനത്ത ആഘാതമായി. എന്‍റെ സഹോദരൻ കെ. പ്രതാപൻ ബി.ജെ.പിയിൽ ചേർന്നുവെന്ന വാർത്ത..! ഇങ്ങനെയൊരു മാറ്റത്തിന്‍റെ വിദൂര സൂചനയെങ്കിലും അറിഞ്ഞിരുന്നെങ്കിൽ ആ നീക്കം ശക്തമായി തടയുമായിരുന്നു. എന്തായിരുന്നു ഈ മനംമാറ്റത്തിനു വഴിവെച്ച സാഹചര്യമെന്നെങ്കിലും പൊതുസമൂഹത്തോടു പറയാനുള്ള ബാദ്ധ്യത പ്രതാപനുണ്ട്.

സഹപ്രവർത്തകരായ, പരിചിതരും അപരിചിതരും അമർഷത്തോടെ, ഖേദത്തോടെ, സംശയത്തോടെ, വേദനയോടെ എന്നെ വിളിച്ചു കൊണ്ടിരിക്കുന്നു. മറുപടി പറഞ്ഞു തളരുന്നു. പക്ഷേ എന്‍റെ ശക്തി കോൺഗ്രസാണ്, ഈ കുടുംബം ഉപേക്ഷിച്ചു പോകുന്ന ഒരാളെ തടയാൻ മുൻ അറിവുകളില്ലാഞ്ഞതിനാൽ കഴിഞ്ഞില്ലന്ന ചിന്ത അലട്ടുന്നുണ്ട്.

ഒരാളുടെ രാഷ്ട്രീയ തീരുമാനത്തെ വിമർശിക്കാനല്ലാതെ തടസ്സപ്പെടുത്താൻ രക്തബന്ധങ്ങൾക്കും പരിമിതിയുണ്ടല്ലോ..?