രോഗിയെ തലകീഴായി ഇറക്കിയ സംഭവം: പുതിയ റിപ്പോർട്ട്​ വേണം -മനുഷ്യാവകാശ കമീഷൻ

തൃശൂർ: ഗവ. മെഡിക്കൽ കോളജിൽ ആംബ​ുലൻസിൽ നിന്ന്​ തലകീഴായി ഇറക്കിയ രോഗി മരിച്ച സംഭവത്തിൽ ഫോറൻസിക് വിശദാംശങ്ങളടങ്ങിയ പുതിയ റിപ്പോർട്ട് ജില്ല പൊലീസ്​ മേധാവി ഒരു മാസത്തിനകം സമർപ്പിക്കണമെന്ന് സംസ്​ഥാന മനുഷ്യാവകാശ കമീഷൻ. മരിച്ചയാളുടെ പേരോ മരണകാരണമോ ജില്ല പൊലീസ്​ മേധാവിയും മെഡിക്കൽ കോളജ് സൂപ്രണ്ടും സമർപ്പിച്ച റിപ്പോർട്ടുകളിൽ ഇല്ലെന്ന്​ കമീഷൻ അംഗം കെ. മോഹൻകുമാർ ഉത്തരവിൽ പറഞ്ഞു.

കേസ്​ ജൂൺ 22ന് തിരുവനന്തപുരത്ത് പരിഗണിക്കും. സംഭവത്തിൽ മെഡിക്കൽ കോളജ് ആശുപത്രി ജീവനക്കാർക്ക് പങ്കില്ലെന്നാണ് സൂപ്രണ്ട് സമർപ്പിച്ച റിപ്പോർട്ടിൽ പറയുന്നത്. മരണവുമായി ബന്ധപ്പെട്ട് രണ്ട് ൈക്രം കേസുകൾ രജിസ്​റ്റർ ചെയ്തിട്ടുണ്ടെന്ന് ജില്ല പൊലീസ്​ മേധാവിയുടെ റിപ്പോർട്ടിലുണ്ട്​.