വേളാങ്കണ്ണിയിൽ മലയാളി തീർഥാടകർ സഞ്ചരിച്ച ബസ് മറിഞ്ഞ് രണ്ട് പേർ മരിച്ചു

ചെന്നൈ: തൃശൂരിൽനിന്ന്​ വേളാങ്കണ്ണിയിലേക്ക്​ പോയ തീർഥാടക സംഘം സഞ്ചരിച്ച ടൂറിസ്റ്റ്​ ബസ്​ നിയന്ത്രണംവിട്ട്​ മറിഞ്ഞ്​ കുട്ടിയടക്കം രണ്ടു​ മരണം. 30ഓളം പേർക്ക്​ പരിക്കേറ്റു. പലരുടെയും നില ഗുരുതരമാണ്​. തൃശൂർ ഒല്ലൂർ നെല്ലിക്കുന്ന്​ സ്വദേശികളായ സ്വരാജ്​ നഗർ പുളിക്കൻ വീട്ടിൽ വർഗീസ്​ ഭാര്യ ലില്ലി(63), വരന്തരപള്ളി പള്ളിക്കുന്ന്​ ജെറാൾഡ്​ ജിമ്മി(ഒൻപത്​​) എന്നിവരാണ്​ മരിച്ചത്​.

ഞായറാഴ്ച പുലർച്ച നാലര മണിയോടെ തഞ്ചാവൂർ ഓരത്തുനാട്​ ഒക്കനാട്​ കീഴയൂരിലെ വളവിൽവെച്ച്​ നിയന്ത്രണംവിട്ട്​ കെ.വി ട്രാവൽസ്​ എന്ന ടൂറിസ്റ്റ്​ ബസ്​ റോഡരുകിലെ ഇരുമ്പ്​ ബാരിക്കേഡ്​ തകർത്ത്​ കനാലിലേക്ക്​ മറിയുകയായിരുന്നു. ​ഡ്രൈവറും ക്ലീനറും ഉൾപ്പെടെ ബസിൽ 51 യാത്രക്കാരാണുണ്ടായിരുന്നത്​.

വാഹനമോടിക്കവെ ഡ്രൈവർ ഉറക്കത്തിൽപ്പെട്ടതാണ്​ കാരണമെന്നാണ്​ പൊലീസ്​ നിഗമനം. ​അപകടത്തിൽപ്പെട്ടവരുടെ നിലവിളി കേട്ട്​ സമീപവാസികളും അതുവഴി വാഹനങ്ങളിലെത്തിയവരും ചേർന്നാണ്​ രക്ഷാപ്രവർത്തനം നടത്തിയത്​. പലരുടെയും കൈകാലുകൾ മുറിഞ്ഞ നിലയിലാണ്​ പരിക്കേറ്റവരെ തഞ്ചാവൂർ ഗവ. മെഡിക്കൽ കോളജാശുപത്രിയിലും മന്നാർകുടി, ഓരത്തുനാട്​ ഗവ. ആശുപത്രികളിലും പ്രവേശിപ്പിച്ചു.

ശനിയാഴ്ച വൈകീട്ട്​ ഏഴുമണിക്കാണ്​ വേളാങ്കണ്ണി ആരോഗ്യമാതാ ദേവാലയത്തിലെ ഓശാന ശുശ്രൂഷ ചടങ്ങുകളിൽ പ​ങ്കെടുക്കാനായി സംഘം ഒല്ലൂരിൽനിന്ന്​ പുറപ്പെട്ടത്​.

അതിനിടെ മരിച്ചവരുടെ കുടുംബങ്ങൾക്ക്​ രണ്ട്​ ലക്ഷം രൂപയും ഗുരുതരമായി പരിക്കറ്റവർക്ക്​ അര ലക്ഷം രൂപ വീതവും ധനസഹായം അനുവദിച്ച്​ തമിഴ്​നാട്​ മുഖ്യമന്ത്രി എം.കെ സ്റ്റാലിൻ ഉത്തരവിട്ടു.