അടൂരിൽ വിവാഹവസ്ത്രമെടുക്കാൻ പോയവരുടെ കാർ കനാലിലേക്ക് മറിഞ്ഞ് മൂന്ന് പേർ മരിച്ചു

പത്തനംതിട്ട: അടൂർ കരുവാറ്റ പള്ളിക്ക്​ സമീപം കാർ കനാലിലേക്ക്​ മറിഞ്ഞ്​ മൂന്ന്​ സ്ത്രീകൾ മരിച്ചു. നാലുപേരെ രക്ഷപ്പെടുത്തി. ബുധനാഴ്ച ഉച്ചക്ക്​ 2.30 ഓടെയാണ്​ സംഭവം. കൊല്ലം ആയൂർ അമ്പലമുക്ക്​ കാഞ്ഞിരത്തുംമൂട്​ (ഹാപ്പിവില്ല) സ്വദേശികളായ ഇന്ദിര(57), ശകുന്തള(51), ബിന്ദു(38) എന്നിവരാണ്​ മരിച്ചത്​.

അലൻ (14), അശ്വതി(27), ഡ്രൈവർ ശരത്ത്​, ശ്രീജ (45), എന്നിവർക്കാണ്​ പരിക്കേറ്റത്​​. ഇവരെ അടൂർ ജനറൽ ആശുപത്രിയിൽ പ്രവേശിപ്പിച്ചു. വിവാഹ ചടങ്ങിന്‍റെ ഭാഗമായി ഹരിപ്പാട്ട്​ വിവാഹ വസ്ത്രമെടുക്കാൻ പോയവരുടെ കാറാണ്​ അപകടത്തിൽപ്പെട്ടത്​. കുട്ടികളടക്കം ഏഴുപേർ കാറിലുണ്ടായിരുന്നു.

രണ്ട്​പേർ സംഭവ സ്ഥലത്തുതന്നെ മരിച്ചു. അപകടത്തിന് പിന്നാലെ കാർ പാലത്തിനടിയിലേക്ക്​ ഒഴുകിപോയത്​ രക്ഷാപ്രവർത്തനത്തിന്​ തടസമായി. ഓടികൂടിയ നാട്ടുകാരും മറ്റുമാണ്​ രക്ഷാ പ്രവർത്തനം നടത്തിയത്​.