നീറ്റിലെ മലയാളിത്തിളക്കമിങ്ങനെ; പട്ടിക 20 ദിവസത്തിനകം

മാവേലിക്കര: നീറ്റ് പരീക്ഷയിൽ ഒന്നാം റാങ്ക്​ മുതൽ മലയാളിത്തിളക്കമുണ്ട്​. കാർത്തിക ജി. നായർ ആണ്​ അഖിലേന്ത്യ തലത്തിൽ ഒന്നാം റാങ്ക്​ നേടിയ മലയാളി. കേരളത്തിൽ പരീക്ഷയെഴുതിയതിൽ ഒന്നാം റാങ്ക് ഗൗരി ശങ്കറിനാണ്​​.

അഖിലേന്ത്യ തലത്തിൽ ഒന്നാം റാങ്ക്​ നേടിയ കാർത്തിക ജി. നായർ മഹാരാഷ്​ട്രയിലാണ്​​ പരീക്ഷ എഴുതിയത്​. കണ്ണൂർ കരിവെള്ളൂർ സ്വദേശിനിയാണ്​. ആകെ മാർക്കായ 720 സ്​കോർ ചെയ്​ത കാർത്തിക നവി മുംബൈയിൽ സ്വകാര്യ കമ്പനിയിൽ ഉദ്യോഗസ്​ഥനായ ഗംഗാധരൻ നായരുടെയും പൻവേൽ പിള്ള കോളജ്​ അധ്യാപികയായ ശ്രീവിദ്യയുടെയും മകളാണ്​. പൻവേൽ ഡി.എവി സ്​കൂൾ വിദ്യാർഥിനിയാണ്​.

വെട്ടിയാർ പള്ളിയറക്കാവ്​ ക്ഷേത്രത്തിന്​ സമീപം തണൽ വീട്ടിൽ സുനിൽകുമാർ -രേഖ ദമ്പതികളുടെ മകനാണ്​ ഗൗരി ശങ്കർ. അഖിലേന്ത്യ തലത്തിൽ 17ാം റാങ്കാണ്​ ഈ കൊച്ചുമിടുക്കന്​. 720ൽ 715 മാർക്ക്​ നേടി.

ഇ-മെയിലിൽ വന്ന അറിയിപ്പിൽ നിന്നാണ്​ ഉന്നത വിജയം നേടിയ വിവരം​ ഗൗരി ശങ്കർ അറിഞ്ഞത്​. മാവേലിക്കര പാറ്റൂർ ശ്രീബുദ്ധ സെൻട്രൽ സ്​കൂളിലാണ്​ എൽ.കെ.ജി മുതൽ പത്താംതരംവരെ പഠിച്ചത്​. 98.2 ശതമാനം മാര്‍ക്കോടെയാണ്​ പത്താം ക്ലാസ് വിജയം. ചങ്ങനാശ്ശേരി ചെത്തിപ്പൂഴ പ്ലാസിഡ്​ വിദ്യ വിഹാറിൽനിന്ന്​ പ്ലസ്​ ടുവിന്​ 98.8 ശതമാനം മാർക്കോടെ മികച്ച​ വിജയം നേടി. ആഴ്ചയില്‍ ഒരു ദിവസമായിരുന്നു നീറ്റ് പരിശീലനം.

രക്ഷകര്‍ത്താക്കളുടെയും അധ്യാപകരുടെയും പിന്തുണയും ചിട്ടയായ പഠനവും സമയക്രമവുമാണ് നേട്ടത്തിന് കാരണമെന്ന് ഗൗരിശങ്കർ പറഞ്ഞു. ആറാം ക്ലാസ്​ മുതലാണ് ഡോക്​ടറാകാനുള്ള മോഹം മനസ്സില്‍ കയറിയത്. ശസ്ത്രക്രിയക്ക് ശേഷം വീട്ടില്‍ വിശ്രമത്തിലിരുന്ന മുത്തച്ഛനെ പരിചരിച്ചു കൂട്ടിരുന്നതാണ് ആഗ്രഹത്തിന്​ പിന്നിലെ കാര്യം. ഡൽഹി ഓൾ ഇന്ത്യ ഇൻസ്​റ്റിറ്റ്യൂട്ട്​ ഓഫ്​ മെഡിക്കൽ സയൻസസിൽ എം.ബി.ബി.എസ്​ പഠിക്കണമെന്നാണ്​ ആഗ്രഹിക്കുന്നതെന്ന്​ ഗൗരി ശങ്കർ കൂട്ടിച്ചേർത്തു. പിതാവ്​ സുനിൽ മുൻ പ്രവാസിയാണ്​​. അനുജന്‍ പവി ശങ്കർ പ്ലസ്ടു വിദ്യാര്‍ഥിയാണ്.

കേരളത്തിൽനിന്നുള്ള വൈഷ്​ണ ജയവർധനൻ 710 സ്​കോറോടെ അ​ഖിലേന്ത്യതലത്തിൽ 23ാം റാങ്കും നേടി. കേരളത്തിൽനിന്നുള്ള ആർ.ആർ. കവിനേഷന്​ 30ാം റാങ്കുമുണ്ട്​. 60ാം റാങ്കുള്ള സി. നിരുപമയും കേരളത്തിൽനിന്ന്​ മുൻനിര റാങ്കിൽ ഇടംപിടിച്ചു. 3830ാം റാങ്കുള്ള ജോനാഥൻ എസ്​. ഡാനിയൽ എസ്​.ടി വിഭാഗത്തിൽ ദേശീയതലത്തിൽ ആറാം സ്ഥാനത്തെത്തി.

​ഇത്തവണ 1,16,010 പേരാണ്​ കേരളത്തിൽനിന്ന്​ നീറ്റ്​ പരീക്ഷക്ക്​ അപേക്ഷിച്ചത്​. കഴിഞ്ഞ സെപ്​റ്റംബർ 12ന്​ നടന്ന നീറ്റിൽ 15.44 ലക്ഷം വിദ്യാർഥികളാണ്​ രാജ്യത്താകെ പരീക്ഷ എഴുതിയത്​. 15 വിദ്യാർഥികളുടെ ഫലം തടഞ്ഞുവെച്ചു. 8,70,074 പേർ യോഗ്യത നേടി.

കേരളത്തിലെ പ്രവേശന നടപടികൾക്കായി നീറ്റ്​ സ്​കോർ അടിസ്ഥാനപ്പെടുത്തിയുള്ള സംസ്ഥാന റാങ്ക്​ പട്ടിക 15- 20 ദിവസത്തിനകം പ്രസിദ്ധീകരിക്കും. ഇതിനായി നീറ്റ്​ പരീക്ഷ നടത്തുന്ന നാഷനൽ ടെസ്​റ്റിങ്​ ഏജൻസിയിൽനിന്ന്​ ​ കേരളത്തിൽനിന്ന്​ യോഗ്യത നേടിയ കുട്ടികളുടെ വിവരം പ്രവേശന പരീക്ഷ കമീഷണറേറ്റ്​ ശേഖരിക്കും. ഇതിനുശേഷം വിദ്യാർഥികൾക്ക്​ നീറ്റ്​ മാർക്ക്​ വെബ്​സൈറ്റ്​ വഴി സമർപ്പിക്കാനുള്ള അവസരം നൽകും. ഇതുകൂടി പരിഗണിച്ചായിരിക്കും സംസ്ഥാന റാങ്ക്​ പട്ടിക തയാറാക്കുക.

സർക്കാർ മെഡിക്കൽ കോളജുകളിലെ 85 ശതമാനം സീറ്റുകളിലേക്കും സ്വകാര്യ സ്വാശ്രയ കോളജുകളിലെ മുഴുവൻ സീറ്റുകളിലേക്കും സംസ്ഥാന റാങ്ക്​ പട്ടികയിൽനിന്നായിരിക്കും പ്രവേശനം. 15 ശതമാനം അഖിലേന്ത്യ ക്വോട്ടയിൽ കേന്ദ്ര ആരോഗ്യമന്ത്രാലയത്തിന്​ കീഴിലുള്ള മെഡിക്കൽ കൗൺസലിങ്​ കമ്മിറ്റിയാണ്​ പ്രവേശന നടപടികൾ നടത്തുക.