തിരുവനന്തപുരത്ത്​ ജ്വല്ലറി ഉടമയെ കാർ തടഞ്ഞ്​ വെട്ടിപ്പരിക്കേൽപിച്ച് 100 പവൻ കവർന്നു; ഒരാളെ തട്ടിക്കൊണ്ടുപോയി

പോത്തൻകോട് (തിരുവനന്തപുരം): ജ്വല്ലറി ഉടമയെ കാർ തടഞ്ഞ്​ മുളകുപൊടിയെറിഞ്ഞ് വെട്ടിപ്പരിക്കേൽപിച്ച് 100 പവൻ സ്വർണം കവർന്നു. വെള്ളിയാഴ്​ച രാത്രി എ​േട്ടാടെ പള്ളിപ്പുറം ടെക്നോസിറ്റി പ്രധാന കവാടത്തിന് മുന്നിലായിരുന്നു സംഭവം. നെയ്യാറ്റിൻകര കേരള ഫാഷൻ ജ്വല്ലറി ഉടമ മഹാരാഷ്​ട്ര സ്വദേശി സമ്പത്തിനെയും (47) കാർ ഡ്രൈവർ അരുണിനെയുമാണ് രണ്ട്​ കാറുകളിലെത്തിയ എട്ടംഗസംഘം ആക്രമിച്ചത്​.

കാറിൽ ഒപ്പമുണ്ടായിരുന്ന ലക്ഷ്​മണയെ സംഘം തട്ടിക്കൊണ്ടുപോയതായും പരാതിയുണ്ട്​. ജില്ലയിലെ ജ്വല്ലറികൾക്ക് ആവശ്യമായ സ്വർണ ഉരുപ്പടികൾ നിർമിച്ച് നൽകുന്ന മൊത്ത വ്യാപാരിയാണ്​ സമ്പത്ത്​. കാറിലുള്ളവരെ വെട്ടിയശേഷം ഡ്രൈവർ അരുണിനെ മർദിച്ച് അവശനാക്കി. തുടർന്ന്​ മോഷണസംഘം അവർ വന്ന കാറിൽ കയറ്റി അരുണിനെ വാവറയമ്പലം ജങ്​ഷനുസമീപം ഉപേക്ഷി​െച്ചന്നാണ്​ മൊഴി. അവിടെ നിന്ന് ഓട്ടോയിലാണ് അര​ുൺ മംഗലപുരം സ്‌റ്റേഷനിൽ എത്തിയത്.

മുന്നിലും പിന്നിലും കാറിലെത്തിയ സംഘമാണ് ആക്രമിച്ചതെന്ന്​ സമ്പത്ത്​ പറഞ്ഞു. മുന്നിലെ കാർ നിർത്തിയാണ് ഇവർ സഞ്ചരിച്ച കാർ തടഞ്ഞത്. വെട്ടുകത്തി ഉപയോഗിച്ച്​ ഗ്ലാസ് തകർത്ത് മുഖത്തേക്ക് മുളകുപൊടി എറിയുകയായിരുന്നു. ആറ്റിങ്ങൽ ഭാഗങ്ങളിലെ ജ്വല്ലറികൾക്ക് കൊടുക്കാനായി കൊണ്ടുവന്ന 788 ഗ്രാം സ്വർണമാണ്​ കവർന്നതെന്ന് സമ്പത്ത്​ മംഗലപുരം പൊലീസിന് നൽകിയ മൊഴിയിൽ പറയുന്നു. മംഗലപുരം പൊലീസ് അന്വേഷണം തുടങ്ങി.