തിരുനാവായ-തവനൂർ പാലം: ഇ. ശ്രീധരന്‍റെ രണ്ടാം നിവേദനത്തിൽ തീരുമാനമെടുക്കണമെന്ന് ഹൈകോടതി

കൊച്ചി: നിർദിഷ്ട തിരുനാവായ-തവനൂർ പാലത്തിന്റെ നിലവിലെ അലൈൻമെന്‍റ് ചോദ്യംചെയ്ത് മെട്രോമാൻ ഇ. ശ്രീധരൻ രണ്ടാമത്​ നൽകിയ നിവേദനത്തിൽ 14 ദിവസത്തിനുള്ളിൽ തീരുമാനമെടുക്കണമെന്ന് ഹൈകോടതി. പുതിയ അലൈൻമെന്‍റടക്കം ഉൾപ്പെടുത്തി നൽകിയ നിവേദനം സംബന്ധിച്ചാണ്​ ജസ്റ്റിസ് ജി. ഗിരീഷ്, ജസ്റ്റിസ് പി.വി. ബാലകൃഷ്ണൻ എന്നിവരടങ്ങിയ ഡിവിഷൻ ബെഞ്ചിന്റെ ഉത്തരവ്.

ആദ്യം നൽകിയ പരാതിയിൽ തീരുമാനമെടുക്കാൻ നേരത്തേ കോടതി നിർ​ദേശിച്ചെങ്കിലും അലൈൻമെന്റ് മാറ്റുന്നത് 2.40 കോടി രൂപയുടെ അധികബാധ്യതയാക്കുമെന്ന്​ ചൂണ്ടിക്കാട്ടി നിവേദനം സർക്കാർ തള്ളിയിരുന്നു. തുടർന്നാണ്​ അധികബാധ്യതയുണ്ടാവില്ലെന്ന്​ വ്യക്തമാക്കി വീണ്ടും നിവേദനം നൽകിയത്​.

നിലവിലെ അലൈൻമെന്റ് പ്രകാരം പാലം നിർമിച്ചാൽ കേരളഗാന്ധി കെ. കേളപ്പന്റെ സ്മൃതിമണ്ഡപത്തെയും ഭാരതപ്പുഴയുടെ തീരത്തുള്ള ക്ഷേത്രങ്ങളെയും ബാധിക്കുമെന്ന്​ ഹരജിയിൽ പറയുന്നു. നിലവിൽ ചരിഞ്ഞാണ് പാലം നിർമാണം പദ്ധതിയിട്ടിരിക്കുന്നത്​. ഇത് ബലക്ഷയത്തിന് കാരണമാകും.

ഇതിനുപകരം സർക്കാറിന് താൻ സമർപ്പിച്ച രണ്ട് രൂപരേഖകളിലൊന്ന്​ സ്വീകാര്യമാണെങ്കിലും അധികബാധ്യതയുണ്ടാക്കുമെന്നാണ്​ സർക്കാർ വാദം. എന്നാൽ, പാലം നിർമാണത്തിന്​ സ്വയം ഭൂമി വിട്ടുനൽകാൻ ഉടമകൾ തയാറാണെന്നും നിലവിൽ ഏറ്റെടുത്ത കേളപ്പജിയുടെ ഭൂമി തിരികെ നൽകാൻ തയാറായാൽ തുക മടക്കിനൽകി ഭൂമി തിരിച്ചെടുക്കാൻ സർവോദയ മണ്ഡൽ തയാറാണെന്നും ഇ. ശ്രീധരൻ ഹരജിയിൽ പറയുന്നു.