മാവേലിക്കര സബ്ജയിലില്‍ നിന്ന് മോഷണക്കേസ് പ്രതി രക്ഷപ്പെട്ടു

മാവേലിക്കര: മോഷണക്കേസ് പ്രതി മാവേലിക്കര സബ്ജയിലില്‍നിന്ന് രക്ഷപ്പെട്ടു. ഞായറാഴ്ച വൈകീട്ട് സബ്ജയിലിലെ അന്തേവാസികളെ ലോക്കപ്പിലാക്കുന്ന വേളയിലാണ് സംഭവം. തിരുവന്‍വണ്ടൂര്‍ നന്നാട് തുരുത്തേല്‍ ജയപ്രകാശാണ്​(45)  രക്ഷപ്പെട്ടത്. 

ജയില്‍വളപ്പിലെ ചന്ദനമരത്തില്‍കൂടി ഓഫിസ് കെട്ടിടത്തിന് മുകളില്‍ കയറി മതില്‍ചാടുകയായിരുന്നു. പുളിക്കീഴ്, എടത്വാ പൊലീസ് സ്‌റ്റേഷനുകളില്‍ ഇയാള്‍ക്കെതിരെ മോഷണക്കേസുണ്ട്. ഒരു വര്‍ഷമായി ജയപ്രകാശ് മാവേലിക്കര സബ്ജയിലിലുണ്ട്. ജയിലധികൃതരും പൊലീസും ചേര്‍ന്ന് പ്രദേശത്ത് തിരച്ചില്‍ നടത്തിയെങ്കിലും കണ്ടെത്താനായില്ല.