തെരുവത്ത് രാമന്‍ അവാര്‍ഡ് കെ.പി. ഹാരിസിന്

കോഴിക്കോട്: ദിനപത്രങ്ങളിലെ മികച്ച ഒന്നാം പേജ് രൂപകൽപനക്ക് കാലിക്കറ്റ് പ്രസ് ക്ലബ് ഏര്‍പ്പെടുത്തിയ 2022ലെ തെരുവത്ത് രാമന്‍ പുരസ്‌കാരത്തിന് ചന്ദ്രിക സബ് എഡിറ്റര്‍ കെ.പി. ഹാരിസ്‌ (ഹാരിസ്‌ മടവൂർ) അര്‍ഹനായി. ഡിസംബർ 19ലെ ചന്ദ്രിക ദിനപത്രത്തിന്റെ ‘മെസിമുത്തം’ എന്ന തലക്കെട്ടിലുള്ള ഒന്നാം പേജ് രൂപകൽപന ചെയ്തതിനാണ് പുരസ്കാരം. 15,000 രൂപയും പ്രശസ്തിപത്രവും അടങ്ങുന്നതാണ് അവാര്‍ഡ്.

മുതിര്‍ന്ന മാധ്യമപ്രവര്‍ത്തകരായ എ. സജീവൻ, വി.ഇ. ബാലകൃഷ്ണൻ, ആർട്ടിസ്റ്റ്‌ ഇ.എന്‍. ജയറാം എന്നിവരടങ്ങിയ ജൂറിയാണ് ജേതാവിനെ നിര്‍ണയിച്ചതെന്ന് പ്രസ്‌ ക്ലബ് പ്രസിഡന്റ്‌ എം. ഫിറോസ് ഖാനും സെക്രട്ടറി പി.എസ്‌. രാകേഷും വാർത്തക്കുറിപ്പിൽ അറിയിച്ചു.

പ്രദീപം പത്രാധിപരായിരുന്ന തെരുവത്ത് രാമന്റെ സ്മരണാർഥം അദ്ദേഹത്തിന്റെ കുടുംബം ഏര്‍പ്പെടുത്തിയതാണ് അവാര്‍ഡ്.